Database himuon

Plano sa Mandaue City Social Welfare Office (CSWS) nga mohimo ug database sa mga pangalan sa mga residente sa nagkadaiyang barangay sa dakbayan.

Kini maoy gustong mahitabo sa bag-ong officer-in-charge sa CSWS nga si Jessie Perez.

Sumala ni Perez nga tuyo niini aron mas mopaspas ang ilang paghatag og ayuda sa mga residente kon adunay mga kalamidad nga moigo sa usa ka dapit sa dakbayan sama sa baha o sunog.

Matod ni Perez nga makigalayon unya ang iyang buhatan sa mga barangay kapitan sa dakbayan alang sa maong tahas.

“Among i-strengthen ang disaster response nato, relief operation sa mga tawo [kun adunay kalamidad nga mahitabo],” matod ni Perez sa Superbalita Cebu.

Paambit niya nga pinaagi sa database sa mga pangalan sa residente sa usa ka barangay, malikayan nga madobleg hatag og ayuda ang usa ka biktima ug mailhan kadtong mga oportunista nga magpakaaron-ingnon nga biktima.

Kahinumduman nga nalangay ang pagpanghatag og ayuda sa mga residente sa sunog sa Barangay Subangdaku sayo ning buwana.

Si Mayor Luigi Quisumbing niangkon nga nalangay ang hinabang tungod sa berepikasyon sa girehistrong mga biktima.

Ang mayor nakasakop og nagpakaaron-ingnon nga biktima kinsa niingon nga namasin nga makadawat og pinansyal nga tabang.

Mao kini hinungdan nga nihangyo ang mayor sa konseho nga mopasar og ordinansa nga silutan ang mga oportunista sa trahedya. Si Perez opisyal nga gitudlo nga bag-ong OIC sa CSWS ni Quisumbing pinaagi sa memorandum nga gipirmahan niini niadtong Martes.