DWUP makigtagbo sa taga-Sirao
Usa ka consultative meeting ang gikatakda nga pagahimuon sa Division for the Welfare of the Urban Poor (DWUP) sa dakbayan sa Sugbo ngadto sa mga residente sa Barangay Sirao nga apektado sa padayon nga pagdahili sa yuta sa dapit.
Tungod sa daghang rekomendasyon sa nagkalain-laing departamento nga misusi sa dapit nagtinguha ang DWUP nga usahon ang implementasyon niini.
Gipasabot sa operations head sa DWUP Genevieve Alcoseba nga ang ilang buhatahan lakip na ang Cebu City Disaster Risk Reduction Management Office (CCDRRMO), City Agriculture Department dunay nagkalainlaing rekomendasyon sa Barangay Sirao.
Subay niini usa ka consultative meeting ang gikatakdang ipahigayon sa DWUP ugmang adlawa aron usab makapahigayon sila og validation sa mga apektadong pamilya ug ma-finalize na lista kun kinsa kadtong mahimong makadawat og hibanag pinansiyal gikan sa siyudad.