Detachment sa pulis sa bukid sa Cebu City ibalhin duol sa Compostela

Ibalhin sa laing lugar ang detachment sa Barangay Agsungot aron mapalapdan pa ang police visibility sa mga bukirang barangay sa amihanang distrito sa dakbayan sa Sugbo.

Si Konsehal Dave Tumulak, deputy mayor on police matters, nagkanayon nga di haom ang police detachment sa Barangay Agsungot sanglit pito ka kilometro ra ang distansya niini sa Police Station 8 sa Barangay Talamban.

Ilang plano, ibalhin kini sa Barangay Paril o Cambinocot sanglit ang duha ka barangay nahimutang kapin 12 kilometro gikan sa Station 8.

Matod ni Tumulak nga aprobado na ni Sr. Supt. Joel Doria ang maong plano sanglit dako kini og ikatabang sa pagsumpo sa pagpayuhot sa mga ‘paltik’ nga armas ug kalihukan sa ginadiling drugas sa kabukiran.

Gitug-an sa konsehal nga ang barangay Paril utlanan tali sa Cebu City ug Compostela diin adunay karsada nga nagdugtong tali sa duha ka lugar nga maoy posibleng agianan sa mga illegal nga armas o shabu.

Dugang niya nga dali ra usab maka-responde ang mga pulis gikan sa Cebu City Public Safety Battalion kon adunay mga emerhensiya nga nagkinahanglan sa presensiya sa mga otoridad ug dako usab og ikatabang sa pagpatunhay sa kalinaw sa kabukiran.

Laing mga detachment sa pulis nahimutang sa Barangay Sudlon 1 ug laing duha ka barangay nga mao say mopatuman sa kahapsay ug kalinaw sa mga bukirang barangay sa south district.