SPO1 Sausage

Samtang naminaw ko sa balita, di ko syur maluoy ba ko sa pulis o mokatawa. Ganahan ko maluoy kay lalaki pud baya ko, ug di ko kaingon nga perpekto ko nga pagkabana.

Sa kinailawman sa akong tungol naa koy kakulba unsa kaha kon sa ako to nahitabo. Laliman mo nang lapwaan imong tintin? Apan kining imahe sa linapwaan nga tintin mao puy rason nga ganahan ko mokatawa sa balita.

Mokatawa ka sa hitabo nga wa ka magdahom ug lagpas sa imong imahinasyon. Kana bang nakalitan ka, kanang wa ka kasagang.

Kon ang karne’s baboy maoy lapwaan, dili na katawanan kay natural man nga ang karne lapwaan aron himoong sud-an. Mahitabo ang katawanan kon ang dili angay’ng lapwaan maoy lapwaan, sama sa tintin.

Ang tintin gamiton sa pagpangihi ug pakighilawas. Walay kataw-anan ana. Ang kataw-anan mao nga kon ang tintin himoong sud-an.

Tinood naay uban nga mokaon og tintin, apil pa gani ang itlog. Apan tintin ug itlog kini sa baka diha sa putahe nga gitawag og lansiao. Dinhi sa lansiao magamit ang terminong nga lapwaan, kay sa dili pa ka magluto og lansiao, imo mang lapwaan (pre-boil) ang tintin ug itlog sa baka.

Kon moingon ka nga naay mga tawo nga mokaon og tintin ug itlog gyod sa tawo, aw, lain na nang kaona, ug wa na koy labot ana kay naa ra ba koy readers dinhi nga mga bata ug mga beata.

Unsa ba ning balitaa nga akong gihisgotan? Naay pulis nga naasayn sa among lungsod sa Pinamungajan. Taga Toledo City siya apan sa amoa nadestino. Kadlawon niadtong Hunyo 21, ningkalit og butho ang asawa sa police station ug nasakpan si mister nga may kadulog.

Wa nag-eskandlo si misis, igo ra kining mipauli. Sa balay, gitawagan niya iyang bana, iyang gipapauli kay makig-istorya siya. Pag-abot sa balay, nag-ilis ang bana. Samtang naghubo kini, gibuboan ni misis og binukal nga tubig si mister ug maayong pagkahilos sa lawas ini, lakip ang pobreng tintin, ingon ang balita.

Namahaw mi sa akong misis samtang naminaw ining balitaa sa radyo gahapon. “Mirisi!” ingon si misis. Tingali mao pud to ang reaksyon sa tanang mga asawa nga nakadungog sa balita. Tingali tibuok syudad naglanog-lanog ang pulong “Mirisi” sa mga kabalayan niadtong orasa.

“Maayo gani gilapwaan ra. Ako pa to, giputol na ko to,” ingon akong asawa, dayong butang og sausage sa iyang plato. Nagmahay ko nganong sausage akong giluto.

“Mirisi,” ingon na pud siya, dayong hiwa sa iyang sausage. Iya ning gibali-bali, gituyokgituslok-tuslok sa iyang tinidor dayong lamon.

“Lami imong sausage,” ingon siya. “Thank you,” ingon ko. “Gilapwaan ni?” nangutana siya, dayong katawa. Mikatawa pud ko apan hilaw kaayo.