Parricide
Gipasakaan si Bohol Provincial Board Member Nino Rey Boniel sa kasong parricide, gawas sa uban pang mga kaso, tungod sa matod pa pagpatay sa iyang kaugalingong asawa, si Bien Unido, Bohol Mayor Gisela Boniel. Unsa man kining kasong parricide? Di kini sama sa pasiaw nga kon pari ang patyon, ang kaso parricide, kon Insik gani, ang kaso insecticide, kon patyon sud sa balay, homicide ug kon gawas sa balay, outside.
Sumala pa sa Article 246 sa Revised Penal Code, ang kasong parricide nahimo niadtong tawo nga mipatay sa iyang amahan o inahan, sa iyang anak pursuso o di pursuso (legitimate or illegitimate),
pursuso nga ascendant sama sa apohan, o pursuso nga descendant sama sa apo, sa iyang pinakaslan nga asawa. Sa ato pa kon puyo-puyo lang ang gipatay, di parricide ang kaso.
Parricide gihapon ang kaso bisan pa kon ang magtiayon
legally separated o nagbuwag lang, pero wa maanular ang ilang kaminyuon. Kinahanglan nga ibutang sa information nga sila magtiayon, kay kon di, ang pagptay ilhon lang nga kasong homicide o murder, bisan pa kon maprobar atol sa bista nga sila magtiayon.
Ang labing maayong ebidensiya sa ilang kaminyuon mao ang marriage contract apan mahimo kining probahon pinaagi sa testimoniya sa mga testigo ingon man kon di mo- object ang akusado.
Ubos sa Article 27 of P.D. 1083” (The Muslim Code of Personal Laws), ang usa ka Muslim mahimong adunay upat ka asawa. Apan ang pagpatay sa ikaduha, ikatulo ug ikaupat nga asawa di na matawag nga parricide, tungod kay pagasilotan siya sobra sa silot sa tawo nga di usa ka Muslim.
Pananglit ang usa ka amahan mipatay sa iyang anak nga duha ka adlaw pa lang gikan sa pagkahimugso, matawag pa kini nga parricide? Di. Ang kaso infanticide kon ang bata menos sa tulo ka adlaw gikan sa pagkahimugso.
Kon managsuon ang magpatay, di kini matawag nga
parricide. Mahimo kini nga homicide of murder, depende sa sirkumstansiya. Kon pananglit, dunay mga tawo nga nalambigit sa pagpatay sa bana o kaha sa iyang asawa, kadtong mga tawo nga way relasyon (non-relatives or
strangers) nga miapil sa pagpatay, mahimo lang pasakaan sa kasong homicide o murder.
Pananglit, nagduwa-duwa lang ang amahan sa iyang pusil unya kalit kining nibuto og naigo ug napatay ang iyang asawa o kaha anak, unsa man ang kaso? Ubos sa maong balaod, parricide gihapon ang krimen nga iyang nahimo bisan pa kon wa niya kini tuyua, sa balaod pa, reckless imprudence.