LANCERS SUD SA BAYUGAN FINALS
Nalaksi sa UV Green Lancers ang unang luna sa finals sa 2nd Mayor Kim Lope Asis Collegiate Invitation Basketball tournament human kini midabo-dabo sa Cagayan-based Xavier University Crusaders, 110-70, sa Lope Asis Gym sa Bayugan City kagahapon.
Saktong dominasyon usab ang ilang gipakita batok sa laing Cesafi team USPF Panthers, 110-89, alang sa ilang ikatulong sunodsunod nga kadaugan.
Posibling ikasangka sa Lancer s sa finals ang wala pa usay pildi nga University of Santo Tomas Growling Tigers kinsa mipuan usab sa Emilio Aguinaldo College (EAC) Generals, 85-74, ug sa Crusaders, 92-56, alang sa 2-0 nga baraha.
Kagabii padayon pang nagduwa ang UST ug UV alang sa elimination round samtang ikaharong usab ang USP niini karong alas 9 sa buntag samtang ang XU ug EAC magtakos usab sa alas 10:30 sa buntag.
Nagkinahanglan lang og usa ka quarter ang UV aron ilang mapakita ang dominasyon ug wala na gayud kini molurang sa ilang opensa hangtod sa katapusang pagtingog sa buzzer.
Misuway unta sa pag-arangkada ang XU sa second quarter sa dihang gipasulod ni coach Gary Cortes ang iyang second stringers apan dali ra usab dayon kining milurang human gibalik ang
starting five sa Lancers. Si Monic Silva mitali og 14 putos, samtang midugang og tag 13 puntos sila si Rey Suerte ug Joshue Segumpan.