KAMPO NI HORN NAINSULTOHAN
Kalagot dala ang kasagmuyo maoy gibati sa kampo ni Jeff Horn sa mga gipangluwatan sa Team Pacquiao ning pipila na lang ka adlaw sa dili pa ang away.
Kini human ang legendary
boxing trainer Freddie Roach mipabuhagay nga dili molanat og hataas nga mga round umaabot nga Word Boxing Organization (WBO) welterweight title tali ni WBO welterweight champion Manny Pacquiao ug Australian challenger Jeff Horn karong Dominggo sa Suncorp Stadium sa Brisbane, Australia.
Gawas niini, naghisgut na usab si Roach og rematch nabaniog nga “Fight of the Century” tali ni Pacquiao ug Floyd Mayweather Jr.
Sa mga interview, si Roach nagkanayon nga ang pagpakig-away ni Pacquiao ngadto ni Jeff Horn maoy himuon nilang tikanganan aron matuman ang tinguha niini nga pagpakig rematch ni Mayweather. Nakapabuhagay usab si Roach og pamahayag nga bisan tuod og nagdumili si Pacquiao sa pagtag-an og
knockout nga kadaugan apan alang kaniya dali ra kaayo kini
nga mahuman.
Tungod sa mga gipangyagyag ni Roach, napika ug mibawos pagbira ang kampo ni Horn ug gihinganlan si Pacquiao nga dili lang kay 11-time world champion kon dili usa usab ka world champion texter tungod kay magsigi kinig atubang sa iyang cellphone nga perming mag- text. "Not only is Manny Pacquiao an eleven-time world champion... he is also a world champion texter, because he never gets off his
bloody phone," maod ni Dean Lonergan, promoter ni Horn.
Ang trainer ni Horn nga si Glenn Rushton miakusar usab sa kampo ni Pacquiao nga nakaminos sa 29 anyos nga challenger.
Sa panglantaw ni Rushton nga ang kakompiyansa ni Pacquiao maoy makapausab sa away ug mamahimong pinakalisod nga masinati ni Pacquiao ibabaw sa ring tungod sa grabi nilang preparasyon.