PULIS NASIKOP SA BUY BUST
PO2 NADORRA NADAKPAN NA KANIADTO SA DRUG DEN
Pulis nga nasikop na kaniadto sa usa ka drug den nadakpan sa buy bust sa kapulisan kagahapon sa alas 5:15 sa buntag sa Sitio Kalubihan, Brgy. Tuyan, dakbayan sa Naga.
Si PO2 Ronjie Nadorra, 37, minyo, taga dakbayan sa Toledo, kanhi sakop sa Special Weapons and Tactics (Swat) sa Bogo Police Station, nadakpan sa hiniusang operasyon sa kapulisan.
Ningsikop kaniya gilangkuban sa mga sakop sa Provincial Intelligence Branch (PIB) pinanguluhan ni Supt. Joie Tape Jr.; Regional Special Operations Group (RSOG-7) pinanguluhan ni Sr. Supt. Jonathan Cabal; Provincial Drugs Enforcement Unit pinanguluhan ni Chief Insp. Roland Aliser; Regional Counter-Intelligence Task Force, Provincial Public Safety Company, ug Naga Police Station pinangulohan ni Supt. Gregorio Galsim.
Nasikop sa operasyon si Glenn “Buddy” Sasan, 43, ingon man sila si Clester Requiroso, 36, minyo, ug Russel Juarez,26.
Nakuha gikan ni Nadorra ang lima ka pakite sa shabu lakip ug marked money.
Nakuha sab ang laing tulo ka putos gikan nila ni Sasan, Requiroso ug Juarez, diin nakuha sab ang halin nga kapin sa P2,000.
Si Supt.Yape, hepe sa PIB, nga nahinabi sa Superbalita Cebu, nagkanayon nga si Nadorra nalakip sa high value
target sa kapulisan ug gipanid-an sa CITF isip tipik sa ilang paglimpyo sa hanay sa kapulisan.
Gibutyag niya nga si Nadorra kasamtangang nabutang sa Regional Personnel Admin Holding Unit (RPHAU-7) tungod sa kasong administratiba dihang nadakpan niadtong July 2016 sa dakbayan sa Toledo sud sa usa ka drug den.
Si Nadorra nga nahinabi sa Superbalita Cebu nihilak, nanghimakak nga iya ang shabu nga nasakmit ug nanghimakak nga siya pusher.
Matod niya nga wa siya mag apil-apil sa pagpamaligyag drugas.
Nabungkag ang iyang pamilya hinungdan nga diha na siya sa Tuyan, Naga nagpuyo uban sa iyang bag ong kapuyo.
“Ako sir moangkon nga nakasuyop ko pero ako lang gitilawan human sab ko na- frustrated dihang nadakpan,” dugang ni Nadorra.
Nagtuo siyang dunay tawo
nga nasuko kaniya ug gihimo siyang sacrificial lamb.
Apan si Sasan nga nahinabi sa Superbalita Cebu niangkon nga si Nadorra ang iyang amo.
Makaduha na kahigayon nga siya gisugo sa pagkuha ug pagbaligya sa drugas nga gikan sa Tangke, Talisay.
Sagad bahigon ang drugas sulod usa resort sa dakbayan sa Naga. Hitman ni Jaguar
Samtang kanhi pulis nga giinggong hitman ni anhing Jaguar Diaz nasikop sa kapulisan sa may Salvador st., Brgy. Labagon, Cebu City kagahapon sa buntag.
Ang nasikop mao si kanhi PO1 Duane Salazar, kinsa nataktak na sa serbisyo niadtong 2005. Nakuha gikan kang Salazar mao ang shabu nga balor og P600,000.