BABAYE, 11, NAPUSILAN SA 14 ANYOS, PATAY

Usa ka 14 anyos nga batang lalake aksidenteng nakapusil patay sa iyang 11 anyos nga babayeng pagumangkon sa Brgy. Mainit, dakbayan sa Naga, mga alas 7 pasado sa gabii niadtong Miyerkules.

Ang imbestigasyon nagpakita nga ang lalake, naa sa

eighth grade, nagduwa sa .38 kalibreng revolver nga gikataho nga iya sa maguwang lalake, kinsa nihimakak niini.

Ang armas nibuto ug niigo sa wala nga kilay sa iyang pagumangkon sulod sa balay.

Matod ni SPO1 Maricor Aliganga, Women and Children’s Protection Desk (WCPD) chief, ang lalake ingon sa wa makugang human sa insidente. “Wala siyay reaksiyon. Wala siya na- surprise, morag walay nahitabo ra,” matod niya sa phone interview sa Sun.Star Cebu.

Siya niingon nga ang biktima nanihapon uban sa iyang manghod sud sa balay nga gipuy-an usab sa pamilya sa lalake sa wa pa ang hitabo.

Napalgan sa lalake ang pusil sud sa usa ka bag nga gibiyaan sa gawas sa ilang tindahan.

Diha siya sa balay dihang nibuto ang pusil, ang bala nilapos sa bongbong nga kahoy ug niigo sa batang babaye.

Daling gidala sa mga kabanay ang bata ngadto sa ospital, apan gideklarar kining patay human sa hitabo.

Ang lalake gitugyan ngadto sa city social welfare office alang sa counseling.

Matod ni Aliganga nga ang lalake nakahibawo nga nagduwa siya sa tinuod nga pusil, apan wa siyay kriminal nga tulubagon kay iyang edad ubos sa 15 anyos.