4T KA PULIS, SUNDAWO GIPAKATAP SA SUGBO
Gipakatap ang 4,626 ka mga pulis, kasundalohan, mga sakop sa Coast Guard, Bureau of Fire Protection and Penology, Philippine Navy ug police auxiliary forces alang sa seguridad sa ikatulong hugna sa ASEAN Summit sa Cebu City.
Sa wala pa sila gipadala sa mga dapit nga ilang bantayan, usa ka santos nga misa ug ang send-off ceremony ang gipahiayon sa Central Command sa Lahug, dakbayan sa Sugbo kagahapon.
Ang 21 ka ahensya sa gobiyerno nga gitahasan sa pagpatuman sa kahapsay ug kalinaw ilabi na sa seguridad sa 300 ka mga delegado sa Summit.
Si Chief Supt. Noli Taliño, director sa Police Regional Office (PRO) 7, nihatag og pahimangno sa iyang mga sakop nga ilang buhaton ang gisangon kanila nga mao ang paghatag sa hustong siguridad sa mga bisita. Tinguha sa kapulisan nga zero
crime ang usa ka semana nga kalihukan sa ASEAN meeting.
Awhag usab ni Taliño sa kasundaluhan ug sa mga representante sa kagamhanan sa probinsya sa Sugbo ang paghimu sa ilang trabaho inubanan sa mga pahiyom.
Mas gipahugot pa nila ang seguridad karon bisan kon usa lang ang venue sa pahigayunan sa tigom nga sugdan ugmang adlawa, tungod usab sa mga panghitabo sa nagkadaiyang lugar sa nasud sama sa dakbayan sa Marawi hinuon giklaro ni Talino nga wa silay nadawat nga hulga may kalambigitan sa ASEAN.
Lakip sa iyang gihangyo ang publiko nga makig-alayon sa kapulisan o kasundaluhan kon mahimo di na motuyo pa sa mga lugar nga gidili una ang mga sibilyan ilabi na duol sa dakong hotel nga pahigayunan sa tigom.
“Ang pinaka-importante is ireport sa police o pinakamalapit
na police station yung mga suspicious looking person and activities, sa ganun, maaksyunan agad ng ating police o kahit sinong security
detail dyan,” matod ni Chief Supt. Noli Taliño.
Sugod karong adlawa gitakdang mag anam nag pangabot ang mga bisita nga delegado sa ASEAN meeting diin magsugod na usab ang paghatag sa hugot nga seguridad. /