Baha sa sapa sa Sibonga mimugna og 3 ka oras nga paghuot sa trapiko
Baha nga dala sa pagbunok sa uwan sa kabukiran nilapaw sa taytayan nga padayong giayo sa Brgy. Simala, lungsod sa Sibonga.
Ang baha, nga nilapaw og mga tunga sa metro sa taytayan, nimugna og tulo ka oras nga paghuot trapiko sa dapit niadtong Miyerkules sa hapon hangtod sa gabii.
Si Damiano Ofquera, Sibonga municipal disaster risk reduction and management
officer, nisulti sa Sun.Star Cebu nga ang baha niigo sa taytayan sa Dumlog, nga padayon pang giayo.
Si Ofquera niingon nga ang baha nagsugod sa mga alas 5 sa hapon. Naapektuhan sa baha ang
spillway nga gitukod sa Department of Public Works and Highways (DPWH) nga nagsilbeng temporaryong agianan sa mga motorista samtang padayong giayo pa ang taytayan.
Nikutat ang baha mga alas 8:30 na sa gabii una pa nakapadayon ang mga sakyanan.
Ang taytayan sa Dumlog naguba niadtong Disyembre 2014 atol sa bagyong Seniang nga nimugna og grabeng kadaut sa habagatang Sugbo.
Nikalas usab og mga kinabuhi ang bagyo nga bisan unsa hinay, apan nagdala kini og kusog nga uwan.
Ang pagkaguba sa taytayan nimugna og kalisod sa biyahe paingon sa habagatang Sugbo.
Ang pag-ayo sa taytayan gigahinan og P60 milyunes sa DPWH.
Nilanat pa og mga duha ka tuig kapin una pa nasugdan ang pag-ayo sa mao nga taytayan.