Lisod masubay ang tinubdan sa fake rice sa Lapu: Radaza

Naglisod ang kagamhanan sa dakbayan sa Lapu-Lapu sa pagsubay sa tindahan diin gipalit sa usa ka residente sa Barangay Basak nga mireklamo ngadto sa local radio station nga nakapalit og fake rice.

Si Mayor Paz Radaza interesado sa maong kaso ilabi na nga giingong sa merkado sa Opon napalit ang bugas ug buot niyang masayran ang tindahan aron sa pagtino kon namaligya kini og fake rice.

Gitahasan sa mayor si Basak barangay kapitan Isabelito Darnayla sa pag- locate ni Ginang Delia Alegado aron nga mapangutana kon asa nga tindahan sa merkado sa Poblacion niya napalit ang bugas.

Gitug-an ni Darnayla nga nagmagahi sa pag- cooperate si Alegado sa dihang gisuroy sa iyang mga tanod ang gipuy-an niini sa miaging adlaw.

Nagdumili sa pagtug-an ang reklamante sa tindahan diin niya napalit ang usa ka sako nga bugas niadtong Hunyo 1, gumikan sa kahadlok.

“Giingnan naman hinuon ang akong mga tanod: ‘ Nya modupa mo nako kon patyon ko?',” asoy ni Darnayla base sa pamahayag sa Ginang ngadto sa iyang mga barangay tanod.

Sumala pa sa kapitan nga mihatag og sample sa maong bugas si Alegado nga iyang gipadala sa mga tanod aron nga ipasusi.

Ang buhatan sa Market Administrator kansang buhatan anaa sa ikaduhang andana sa merkado publiko, maglisod sab sa paghimo sa ilang pakisusi kon dili itug-an niini ang maong tindahan.

Sa sayo pa, si Alegado miduaw sa usa ka local radio station sa mga miaging adlaw aron nga pagreklamo sa iyang bugas nga napalit niadtong Hunyo 1 diin iyang gisaysay nga iyang gilugaw ang maoy bugas ug gibutangan og mga rekado alang sa arroz caldo.

Sa pagkabugnaw sa maong lugaw gisud kini sa refrigerator aron nga dili madaot ug sa dihang initon na –unta, nahibubong nalang ang ginang nga nahisama sa maja blanca ang hitsura.