BUGNAW NGA MANGITNGIT FALLS

Nangita ka ba og swimming pool nga ang tubig nga gigamit, tubig nga gikan mismo sa tinubdan nga iya sa kinaiyahan?

Ang tubig di baho og chlorine, di ka mabalaka nga mainum kay ang tubig mainum ug maoy nagsuplay sa tubig sa Metro Cebu.

Gawas sa swimming pool, adunay falls nga gilibutan sa nagkalainlaing matang sa kahoy sama sa gemilina, bongleo, duwal-og, atipo, dakit, tugas, matamban, talisay, narra ug uban pa.

Ang lugar gitawag og Mangitngit Falls anaa kini mahimutang sa Lower Natimaw-an, Barangay Natimaw-an, lungsod sa Carmen.

Matod ni Mayor Martin Gerard Villamor nga usa kini sa ilang ikapasigarbo sa lungsod.

Ang tubig gikan sa falls maoy usa sa tinubdan sa tubig sa Metro Cebu Water District (MCWD) nga nagsuplay sa tubig sa Metro Cebu.

Ang resort adunay entrance nga P30 alang sa mga bata ug P50 sa mga dagko.

Gawas nga bugnaw ang palibot tungod sa kadaghan sa kahoy, madungog nimo ang nagdahunog nga tubig gikan sa falls. Adunay tulo ka hugna ang

swimming pool, adunay mabaw alang sa mga bata ug lain usab sa mga dagko.

Flowing water ang tubig sa swimming pool tungod sa kaabunda sa tubig gikan sa tinubdan ug diritso paingon sa swimming pool.

Ang lugar gibana-bana nga upat ka kilometro ang gilaygikan sa merkado, kun mosakay og habalhabal moplite ka lang og P20, kun magsakay og bus gikan sa siyudad moplite ka og P35 sa mini bus ug P50 sa dagku nga bus gikan sa North Bus Terminal. /

/ JOY TUMULAK MANGITNGIT FALLS: Nagpangamay ang bugnaw nga tubig nga anaa sa tulo ka hugna nga swimming pool nga gikan sa Mangitngit Falls. Daghan na ang nibisita sa lugar nga mga lokal nga turista aron mosuway sa pagtagamtam sa produkto sa kinaiyahan ilabi nang...