Drug free barangay?

Kining pagdeklarar nga drug-free sa usa ka lugar o barangay wala gyud ni hinungdan. Ug sila pa, binutbot lang kini sa mga ahensiya sa gobiyerno nga naghimo ani. Ngano man? Kay nagtuo kaha mo nga drug-free o wala na gyuy tawo nga nagpuyo sa maong barangay nga pusher o adik, ang wa mahilambigit sa drugas? Unsa man ang basihanan nganong i-deklarar nga drug free ang usa ka lugar?

Niadtong miaging tuig gideklarar sa Provincial Police Office nga gipanguluhan ni S/Supt. Eric Noble nga drug free na kuno ang entiro isla sa Camotes. Mi-alma ang Cebu Provincial Anti-Drug Abuse Office (Cpadao) nga gipanguluhan ni kanhi Provincial Board member Irene Durano Meca gumikan kay ang iya rang buhatan ang makadeklarar nga drug-free sa usa ka barangay.

Motuo kaha mo nga drug free ang Camotes island nga tua pa man mag-operate ang galamay ni Alvaro Alvaro alyas Barok? Bisan tuod og napriso na si Barok sa provincial jail, apan ang iyang mga tawo nagpadayon sa pagnegusyo og drugas. Niadtong miaging adlaw, mokabat sa P4 milyones nga shabu ang nasakmit gikan sa usa ka gikatahapang drug lord sa Camotes island. Unya mao nay drug-free?

Dili pa lang dugay adunay mokabat ngadto sa 100 ka mga barangay sa tibuok sa lalawigan ang gideklarar nga drug free. Mismo ang Philippine Drug Enforcement Agency (PDEA) ang nideklarar niini uban sa mga opisyal sa Kapitolyo. Apan karon posibleng hukasan ang 19 niini kay mibalik ang paghitak sa drugas. Tiaw nimo? Aber, unsaon man ni karon?

Mao nang dili gyud ko motuo anang drug-free barangays. Kon wala masumpo ang paghitak sa illegal nga drugas sulod sa mga bilangguan nga restricted o limitado ang lihok sa mga piniriso ug aduna pay mga guwardiya, way rason nga dili maghitak ang drugas sa barangay nga gawasnon ang mga tawo nga mosulod-gawas sa lugar.

Ang taga laing barangay diay nga nahilambigit sa illegal drugs, puwede man gihapon mamaligya sa laing barangay. Mao nga para nako, angay nang ihunong. Way pulos.