Moyango ra

Sukad mibalhin na ngadto sa Bando Osmena Pundok Kauswagan (BOPK) si Konsehal Jerry Guardo, ang tanang mga plano ug mga lakang ni Mayor Tomas Osmeña mabuhat na niya. Si Guardo ang nagbuak sa babag aron mamahimong mahibalik ang mayoriya ngadto sa BOPK nga mao usay naghari sa panahon ni kanhi mayor Michael Rama hinungdan nga nagapos usab ang iyang mga kamot.

Gipasanginlan ni Osmeña ang oposisyon nga maoy nahimong babag sa iyang mga plano sa unang mga buwan sa iyang katungdanan. Karon, iya na ang Konseho human sa maigmatong maneubra.

Mao nang di na ikahibung nga makuha ni Osmena ang tangdo sa Konseho sa pagbaligya sa tulo ka hektaryang luna sa SRP nga matod pa niya, maoy magmatuod nga alkanse ang Siyudad sa pagbaligya ngadto sa Ayala, Filinvest ug SM ni Rama sa 45 hektarya.

Matod niya mas mahal pa ang iyang presyo nga mabaligya ngadto sa gustong mopalit.

Kataw-anan huna-hunaon nga dihang si Rama pa ang nangatungdanan, gihimo sa mga sakop sa BOPK ang tanan aron lang mababagan ang pagbaligya. Nagpasar pa sila og ordinansa aron magapos ang mga kamot sa kanhi mayor.

Karon nga sila na ang mayoriya, ang labing unang gibuhat sa BOPK mao ang pagtugot ni Osmeña nga makabaligya sa luna sa SRP. Uyon sila nga mabaligya ang luna kay si Osmena ang mobaligya, basta di lang si Rama. Ang ilang giyak-an kaniadto maoy una nilang giisa karon.

Sa mosunod nga mga buwan, mapaabot sa mga Sugboanon ang usa ka konseho nga magsige na lang og yangoyango ngadto sa mayor. Sama kaniadto sa dihang siya pa ang nagtimon sa Siyudad, ang tanan niyang gibuhat kanunay nga sakto samtang ang uban nga supak, kanunay nga sayop.