Ikaduhang runway sa Mactan airport

Ang hunta direktiba sa Mactan Cebu International Airport Authority (MCIAA) ubos ni general manager Steve Dicdican nipasar sa usa ka resolusyon nga nag-uyon sa plano sa paghimo sa ikaduhang runway sa Mactan airport.

Kini human sa sugyot ni Kongresista Raul del Mar sa Cebu City north district sa paghimo sa ikaduhang runway ginamit ang P4.9 bilyunes gikan sa P14.4-bilyunes nga premium nga gibayad sa GMR-Megawide Cebu Airport Corp. (GMCAC) sa ilang pagdaog sa P17.5 bilyunes nga proyekto sa pag-ugmad ug pagdumala sa Mactan airport.

Apan hayan nga di matandog ang maong pundo kay ang GMCAC nipadala og unsolicited proposal nga silay motukod sa ikaduhang runway sa kantidad nga P208 bilyunes. Si MCIAA Director Julius G. Neri Jr. nikonpirmar nga nakadawat ang MCIAA board sa maong proposal.

Ang GMCAC, usa ka consortium sa GMR sa India ug sa Megawide sa Pilipinas, gusto usab nga lugwayan ang ilang pagdumala sa Mactan airport gikan sa 25 ngadto sa 50 ka tuig aron mabawi ang ilang investment ug nga sila na maoy modumala sa airside facilities sa Mactan airport.

Si Louie Ferrer, presidente sa GMCAC, namahayag nga mao kini ang labing unang proposal sa usa ka pribadong kompaniya sa pag-ugmad ug pagdumala sa airside facilities sa usa ka airport dinhi sa Pilipinas.

Kon aprobahan kini, ang kapasidad sa Mactan airport mosaka hangtod sa 50 milyunes ka mga pasahero matag tuig. Ang MCIA terminal gidesinyo alang sa 4.5 milyunes ka mga pasahero matag tuig sa dihang nahimo kining usa ka international airport sa tuig 1991. Apan niabot nag unom ka milyon ka mga pasahero matag tuig ang niagi sa maong airport sa dihang ang GMCAC nibanos sa airport terminal operations niadtong tuig 2014. Sumala pa sa proposal sa GMCAC, sila maoy mo- rehabilitate sa unang runway ug mga taxiways sa Mactan airport ug motukod sa parallel nga taxiway nga mahimong usa ka emergency runway, mo-ugmad sa dugang rapid exit taxiways ug runway holding positions. Ang GMCAC mao sab ang motukod sa ikaduhang parallel ug independent runway.

Ang GMCAC mao ang nagtukod sa ikaduhang terminal sa Mactan airport. Ubos sa ilang bag-ong proposal, sila sab ang motukod sa ikatulo nga terminal sa Mactan airport.

Ang mahinungdanon mao nga ang MCIAA board andam ug tagana sa pagtukod sa ikaduhang runway sa Mactan airport bisan si kinsa pa ang mopatuman niini.