Gusto mag-artista ang bag-ong Asia’s Next Top Model

Mga pahalipay kang Maureen Wroblewitz sa iyang pagdaug isip Asia’s Next Top Model karong semanaha. Iyang gibuntog sa finals ang mga kandidata sa Vietnam ug Thailand.

Gwapa si Maureen ug artistahon. Dihang gipangutana, ganahan sab gyud diay siya mag-artista.

Sa akong tan-aw, kaamgid ni Maureen si Liza Soberano. Kon maartista man gyud kini si Maureen, atong tan-awon kon asa siya unang mogawas: sa telebisyon ba o pelikula, sa GMA 7 ba o ABS-CBN ba o sa unsang movie production company.

○○○ Mas daghan tingali ang nakagusto kay sa naglagot sa Wonder Woman kay naa pa man gihapon sa sinehan ang pelikula niadtong Miyerkules. Mas nauna pang nagbabu ang The Mummy ni Tom Cruise.

Morag nauso na sab ang mga kalingawang hadlokhadlok kay human sa The Mummy, gisundan kini sa Ang Pagsanib ni Leah dela Cruz. Wala pa hinoon ko makakita ning ikaduha sa pagsulat nako niini.

Sa telebisyon, naa usab ang Goblin ug ang La Luna Sangre. Lahi sab ang lingaw nga dalit aning klaseha sa tan-awonon.

Karong Hulyo 12, ang Bloody Crayons na sab ang isalida. Kon wa ko masayop, hadlokhadlok sab kini base sa trailer. Mga batan-ong artista ang mga bida dinhi sama nila ni Elmo Magalona, Janella Salvador, Maris Racal ug Yves Flores.

Morag nindot ni tan-awon kay mga batan-on man sab ang mga magdadayeg aning tulo ug morag mas sayon hadlokon kini sila. Alegre tingali ang sulod sa sinehan tungod sa mga singgit.

○○○ Sa pagsulat nako niini, mao sab ang pagsugod sa Tonight With Boy Abunda diin nahisgutan niini ang umaabot nga pelikula sa Star Cinema diin magkauban sila si Aga Muhlach, Dingdong Dantes, Enrique Gil ug Ronaldo Valdez.

Lain kining atanganan kay pulos ‘kusgan’ ang mga bida. Kini diay ang unang pelikula ni Aga human kini ‘magbakasyon’ sa syobis sa nilabay nga unom ka tuig. Kadugay na diay no?