From the bottom of my heart

Nagkadungan mig esnak sa canteen si Carol. Gisuginlan ko siya bahin sa kanunay kong paghunahuna kang Jay. Igo na lang kong nanghupaw. Giangkon ko kang Carol nga nakagusto gyud ko kang Jay.

“Na- in-love ka na gyud, Malou.”

Nahibulong ko kay nagpahiyom man si Carol.

“Naunsa ka man diha, Carol? Gikataw-an man lang nimo ang akong sitwasyon? Gisakitan baya ko.”

“Abi kog lesbian ka, Malou. Di man diay. Pero segurado ka ba gyud nga uyab ni Jay si Layna?”

“Klaro man, Carol. Sweet man sila.”

“Aw, di man na problema. Kon di ka gustong ma- zero sa lovelife, sugta si Ronnie. Makaseguro gyud ka nga iyang mahalon. Sa tan-aw ko, sangko sa langit ang love ni Ronnie nimo.”

“Bitaw. Love kaayo ko ni Ronnie. Pero period na ang iyang paghasol nako.” “Unsay period na, Malou?” Gisugilon ko kang Carol nga mihunong na sa pagpangulitawo si Ronnie nako.

“Sayang. Pero husto ka man sab, Malou. Lisod ang usa ka

relationship nga way gugma.” Pagka hapon, as usual naglakaw ko sa sidewalk

paingon sa huwatanan kog sakyanan paggawas ko na sa eskol. Nagdali ko kay nagtaligsik. Apan mibundak gyud ang kusog nga uwan dihang molabang na unta ko sa pikas dalan diin adto ko mosakay. Wa na lang ko mopadayon kay wa man ko makadalag payong. Mabasa gyud ko kon mopugos kog labang kay kusog man kaayo ang uwan.

Naghunong na lang ko sa akong nahimutangan. Milingiko. Daghan ang mga tawo sa akong duol. Lagmit molabang sab sila sa pikas dalan apan wa mosungsong sa kusog nga uwan. Unya nakatan-aw ko sa usa ka fast food

nga duol ra sab nako. Nakunot ang akong agtang. Didto sa sulod si Jay. Naghinuktok siya, klaro nga naguol siya. Siya rang usa. Nganong di niya kauban si Lyna?

Nagtuo ko nga nag-away sila si Jay ug Layna. Mipakibo na lang ko sa akong mga abaga. Unsay labot nako? Hilom kong nagyaw-yaw. Di ko angay maghunahuna sa lalaki nga esnabero ug batig kinaiya.

Apan sa pagpanglabay sa mga adlaw, wa ko na makita si Layna nga moduaw kang Jay. Kanunay na sab nga makita si Jay nga maghinuktok.

(TAPUSON SUNOD GULA)