Di daw mi bagay

Dear Papa Joe,

Ako diay si Cha, 26 years old. Ang akong problema kabahin sa akong ka relasyon nga wala mauyoni ni Mama ug Papa kay mga Insik man gud akong mga ginikanan. Kining akong ka live in naa ni anak sa laing babaye pero di sila kasado. Pero kining akong kapuyo mekaniko ra ni siya sa motor, dili gyud ing ana ka dako ang kita. Bisan pa niini, malipayon mi.

Ang di gusto sa akong mga gnikanan niya kay lagi gigamit ra ko aning akong kapuyo para mahaw-as sa kalisud. Nagsige pa gyud ni sila og panamay nako kon ngano daw nga di ko mangita og tarong nga lalake nga unta gwapa man daw ko.Nganong sa uyamot pa gyud ko nahigugma ug angkan pa.

Mao ni ang akong suliran karon. Galibog ko kon kinsay akong sundon, ang ako bang kasingkasing o an akong ginikanan.

CHA

Cha,

Kon unsa ang imong pagtuo, mao nay tumana. Kon sa imong tan- aw sayop ang pagtuo sa imong mga ginikanan, then ipamatuod nila nga sayop sila. Hinaot pa nga ang imong uyab o kapuyo makapamatuod niini nga wa siya mag apas og something nimo. Total, ang pagkaadunay anak niini dili problema. Ang importante malipayon ka ug kontento. Pero ayaw sa isalikway ang mga pagtuo sa imong mga ginikanan kay wa baya sad na sila mag-ampo nga maglisud ka.

Basta sa imong edad karon, naa ka na sa hustong panimuot nga makatimbangtimbang kon unsay maayo. Mas maayo nga magpaksal mo para magrasyahan mo. Daghang salamat.