Planong wa mosalir
Sa bag-o pa silang naminyo ug human si Ellen nanganak kang Edwin, ilang panganay, sila si Ellen ug Kevin nagkasabot nga mag- family planning ubos sa reproductive health program sa gobyerno. Gikasabutan nila nga ang gamiton ni Kevin mao da gyud ang kondom, kay segurado kini nga mosalir kon itandi sa uban nga mga paagi. Ang pag-romansa panahon sa safe period sa asawa di kaayo kasaligan kay basig masayop pagkwenta. Ang pagtomar og pills sa asawa may higayon sab nga mapalpak. Busa kondom ang ilang gigamit. Apan nahibulong si Ellen kay bag-uhay lang nga nag-selebrar sa unang birthday si Edwin sa milabay nga bulan namatikdan niya nga mabdos na pod siya.
Usa ka buntag miadto siya sa klinika ni Dra. Evangelina Mercado, iyang oby-gyne, ug mikonsulta.
“Positive nga mabdos kag usa ka buwan, Len,” matod ni Dra. Evangelina.
“Mao ba, Doktora?” ni Ellen. Miyango ang doktora.
Paghiuli ni Ellen sa ilang balay milingkod siya sa sopa sa sala ug naghinuktok. Nahinumdom siya nga nagkasabot sila si Kevin nga kutob ra sa tulo ang ilang himuong liwat nga magkal-ang og duha o tulo ka tuig sa edad. Unsaon na man ini karon nga nasipyat man? Nahibawo man siya nga kada nila labing-labing ni Kevin, si Kevin migamit man gyud og kondom. Ngano kahang mimabdos man siya? Paglabay sa siyam ka buwan nanganak si Ellen sa ikaduha nilang liwat, usa ka batang babaye nga ginganlan nilag Florenda.
“Hon, duha na atong anak. Usa na lang kulang ug stop na ta, ha?” matod ni Ellen kang Kevin usa ka gabii sa dayon na nilang pangatulog.
“Of course, honey!” ni Kevin nga migakos kang Ellen ug mihalok sa ngabil.
“Pero, hon, nahibung ko kay nganong nimabdos man ko nga pirme man kang nagtaod og kondom?” ni Ellen. “Ikaw, wa ka mahibung?”
“Nahibung, uy!” tubag dayon ni Kevin.
“Ngano kaha, no? Depektuso seguro ang kondom nga imong napalit.”
“Wa may depekto nga akong nabatyagan inig gamit nako.”
“Unsa gyud kaha ang hinungdan, no?” ni Ellen nga miwakli sa bukton ni Kevin nga naggakos kaniya. “Unsay imong pagtuo, hon?”
Wala dayon motingog si Kevin. Unya misulti siya, “Ay, basig nahushos samtang nakaabot na ta sa panganod sa himaya, hon?”
“Posible ba na nga huot man na sa imong turogsoy?”
“Posible kaayo, uy!” naisa og diyutay ang tingog ni Kevin.
“Mao ba? Hehehe!” mikagiki si Ellen nga midagpi sa braso ni Kevin. Apan didto sa iyang alimpatakan may nahunahunaan siyang buhaton.
PAGKA UGMA dihang nakalakaw na si Kevin paingon sa iyang opisina, gibuksan ni Ellen ang ilang aparador sa mga biste. Gidumdom niya ang hunos nga gibutangan sa kondom ni Kevin. Diha pay tulo ka buok nga nahibilin. Gitagsa-tagsa niyag humbiling.
“Ah, mao diay! Pagka marukoy tawhana!”nahimalingka siya. Iyang gipagawas ang mga kondom ug nakita niya nga wala na kining mga tumoy, kay klaro kaayong gipanggunting. ( KATAPUSAN)