‘LACION KAMPYON SA NORTH DIVISION
Kulbahinam nga nalangkat sa Consolacion Sarok Weavers ang kampiyonato sa Cebu Governor’s Cup Intercities / municipalities basketball tournament North Division sa dihang nakaipsot kini sa mga kamot sa host Mandaue City, 63-62, sa deciding Game 3 niadtong Miyerkules sa gabii sa Mandaue City Cultural and Sports Complex.
Human sa sikit nga kombati diin nagpuli-puli og sakmit sa labaw ang matag habig, ang Consolacion nakaposte og 5344 nga labaw sa katapusang 7:55 sa fourth quarter.
Apan hinayhinay kining gitibhangan sa Mandaue City
hangtod nga sikit na kaayo ang panag-engkuwentro.
Nag-ung-ong na gyud unta sa kadaugan ang Mandaue sa katapusang 4.7 segundos ang nahabilin sa duwa, apan nasipyat ang duha free throws ni Aljie Mendez ug ingon man ang ilang katapusang itsa nga maoy nakapaugbok sa ilang paglaom.
“We made some adjustments in our defense para sa ila mga shooters. And our players executed our game plan and during our practices they really work hard and full of motivation to
win the championship,” matod ni asst. coach Leo Casinillo.
Sa Game One, ang Consolacion maoy mipatugbabaw batok sa Mandaue, 84-78, apan gibawsan kini sa Game Two, 85-81.
Sa kadaugan, ang Consolacion maoy nakakuha sa katungod nga makigsangka sa nag-paabot nga Minglanilla Archangels kinsa miharos sa ilang North Division finals batok sa Dalaguete sa niaging semana.