Taas pa og lanat

Makakurat ang bag-ong kalamboan sa kaso sa pagkahanaw ug giingong pagkamatay ni Bien Unido Mayor Gisela Bendong-Boniel. Positibo ang DNA test sa dugo nga napalgan sa pumpboat nga giingong gikargahan sa lawas sa mayor ug ang swab sample sa laway sa inahan sa mayor.

Kon managsama ang deoxyribonucleic acid (DNA), kana dako na kaayo ang posibilidad nga ang napalgan nga dugo iya ni Mayor Gisela. Ang DNA usa ka tukma ug husto nga test nga lisod lalison.

Kini natukma usab sa pamahayag sa mga saksi nga gisakay ang lawas sa mayor sa mao nga pumpboat nga gitimon ni Riolito “Etad” Boniel, ig-agaw sa mayor. Si Etad mao usab ang nibutyag nga si Provincial Board Member Niño Rey Boniel ang nipusil patay sa iyang asawa nga ilang gihug sa kadagatan sa isla sa Caubian.

Bisan sa pagsawom sa mga diver sa lapad nga dapit diin gituohang naunlod ang lawas sa mayor, wa gihapon kini makit-i. Giingon sa kampo ni Niño Rey nga ang iyang asawa toa sa Dubai nitago tungod sa dakong utang, wa patya.

Apan unsaon kaha pagtubag sa kampo ni Boniel ang nagtakdo nga mga pamahayag sa mga saksi ug mga ebedensya nga natigom sa mga imbestigador.

Bisan ang board member dunay giingong sayo nga pamahayag nga nagtumbok kang Etad nga maoy nipusil sa iyang asawa. Kusganon kining gihimakak ni Etad sa mga interview sa media kaniya. Iyang gitumbok si Niño Rey.

Apan bisan pa ning giingong resulta sa DNA test nga positibo, mahimo gihapon kining kwestyunon sa kampo sa board member.

Bisan pa ning mga kalamboan karon, kining mao nga kaso di pa daling mahukman sa korte. Molanat pa kini og taas nga panahon tungod sa kuti nga prosesong legal nga mahimong gamiton sa kampo ni Boniel.