OPISYAL SA COMELEC GIPATAY
GIPUSIL SA MERKADO SA BARILI; SUSPEK NAILHAN PINAAGI SA CCTV
■ GIPATAY: Nagbuy-od sa merkado publiko sa lungsod sa Barili, Cebu, ang lawas ni Barili Comelec officer Chresente Flores (sukip nga hulagway) human pusila sa nagbinugtong mamumuno kagahapon sa hapon. Ang babaw nga hulagway gi-share makadaghan sa Facebook.
Tungod sa personal nga kasungian, gipusil-patay ang election officer sa lungsod sa Barili, habagatang Sugbo sa giingong silingan niini kagahapon sa hapon.
Si Cresente Hedralin “Chris” S. Flores, 56, biyudo, namatay human pusila sa agtang nga ang bala nilapos sa luyo.
Ang suspek nga si Gelmar Timagos, silingan sa biktima, nailhan sa kapulisan pinaagi sa kuha sa closed-circuit television (CCTV) camera nga gimontar sa merkado publiko sa Barangay Poblacion, Barili nga diha gawas sa merkado nga nagbitbit og pusil ug dali nga nisibat luwan sa habalhabal.
Si Barili Konsehal Julieto Flores, ig-agaw sa biktima, nibutyag nga ang mga testigo nakakita ni Timagos nga nipusil sa agtang ni Chris duol sa tindahan og feeds sa merkado publiko alas 2 sa hapon.
Matod sa konsehal nga magpalit unta si Chris og lawog alang sa iyang mga binuhing baboy dihang gipusil sa suspek.
Dali gidala ang biktima sa Barili District Hospital, apan gideklarar kini nga dead on arrival.
Sa pagkutlo ning balita, wala pa matino ang kalibre sa armas nga gigamit sa suspek nga gipangita sa kapulisan.
Si Julieto niingon nga daan nang dunay panagbangi ang iyang ig-agaw ug si Timagos diin ang nauwahi, giingong tiggamitan og gidili nga drugas, gikiha sa biktima.
“Bayolente man gud ning suspek kon mahubog. Magwala na siya. Daghan na gani na siya og record sa barangay,” asoy sa konsehal sa lungsod.
Ang silingan sa biktima ug suspek nitug-an ni Julieto nga si Timagos nakig-inom sa iyang mga higala. Ug dihang nakit-an niini si Chris, gihulga kini nga patyon.
“Gibaharan na siya daan nga karon lang siya kutob karong adlawa,” dugang ni Flores.
Suma pa sa konsehal nga bisan sa hulga niadto si Chris sa merkado ug gisundan sa suspek nga nisakay og trisikad.
Si Cebu Provincial Election Supervisor Lionel Marco Castillano gianugnan sa kalit nga kamatayon sa iyang sakop.
“Usa na siya sa akong mga sinaligan sa trabaho,” paghulagway sa opisyal sa Commission on Elections sa biktima.
Matod niya si Chris iyang idestino sa mga critical nga dapit panahon sa mga piniliay.
Siya nahinumdom nga niadtong 2007 election si Chris nitabang sa iyang kauban nga election officer nga nadestino sa lungsod sa Tuburan dihang nahuman na kini og ihap sa mga botos sa lungsod sa Badian diin kini nadestino.
“Beyond the call of his duty pwede ra gud unta siya mouli na. Igo ra intawon siya naligo dayon nidiretso siya sa Tuburan para motabang,” dugang ni Castillano sa Superbalita Cebu.
Sila mosugyot sa Comelec en banc nga mohatag og tabang pinansiyal sa pamilya sa biktima nga may upat ka mga anak nga duna pay nag-eskwela.
Ang asawa niini namatay gumikan sa cancer. /