BRT kinahanglan idayon: Davide

Way nakitang rason si Gob. Hilario Davide III nga angay kanselahon ang pagpatuman sa Bus Rapid Transit (BRT) system sa dakbayan sa Sugbo.

Reaksyon kini sa gobernador human si Presidential Assistant for the Visayas Michael Lloyd Dino nibutyag nga iyang i-lobby kang Presidente Rodrigo Duterte ug mga hingtungdang ahensiya sa gobiyerno ang pagpakansilar sa BRT project tungod kay alang niini mag-usik lang kini og kahago, oras ug kwarta.

Alang sa maong opisyal mas haom ang LRT dinhi sa Sugbo ug dili ang BRT.

Apan alang ni Davide mahimo ra magdungan ang BRT system ug Light Rail Transit dinhi sa Sugbo.

“Para nako there’s no need nga kanselahon. We saw the need for it to decongest also the traffic here and to address the public transport diri sa Cebu City,” pagpasabot ni Davide. Ang gobernador nisaysay nga dihang konsehal pa siya sa dakbayan sa Sugbo nanay mga pagtuon bahin sa BRT system ug nakita nga mahimo ra kini ipatuman sa siyudad.

Ang kagamhanan sa dakbayan sa Sugbo ug Department of Transportation nakakuha og P10.2 bilyones nga utang gikan sa World Bank aron pundohan ang proyekto.

Si Davide nidugang ang BRT anha ipatuman sa dakbayan sa Sugbo nga magsugod sa Barangay Bulacao hangtod sa Barangay Banilad, nga sa sentro sa karsada moagi ug butangan og mga terminal.

Samtang ang LRT kon mahinayon moabot sa 90 kilometros, gikan sa dakbayan sa Carcar hangtod sa siyudad sa Danao ug gikan sa dakbayan sa Mandaue agi sa siyudad sa Lapu-Lapu hangtod sa Mactan-Cebu International Airport.

Kini gibanabanang mogasto og 3 bilyones dolyares kun P150 bilyones.

/ HINAHATAG NGA HULAGWAY ■ DAGWAY SA BRT. Mahimong ingon niani ang dagway sa Osmeña blvd. sa higayon nga mahinayon ang pagdagan sa Bus Rapid Transit (BRT). Apan madayon pa ba kaha kini?