ABC mihangyo kang Osmeña pag-usab sa baruganan sa BRT

Ang Association of Barangay Council (ABC) Cebu City, kansang mayoriya gilangkuban sa mga kapitan nga sakop sa Team Rama, nilagda og manifesto ug nipasar og resolution aron awhagon si Mayor Tomas Osmeña nga i-rekonsiderar ang implementasyon sa Bus Rapid Transit (BRT).

Atol sa asembliya sa mga kapitan sa dakbayan sa Sugbo, ang 45 gikan sa 65 ka mga nanambong nipirma sa manifesto sanglit aduna silay kabalaka nga mapalpak ug mausik lang ang P16 bilyones nga pundo.

Matod pa ni Kapitan Ramil Ayuman, subay usab gipagagawas nga obserbasyon ni Engr. Rene Santiago, eksperto sa transportasyon ug engineering, nga dako og kahigayonan nga di mapahimuslan ang BRT sa iyang katuyoan.

Laing 20 ka mga Team Rama nga barangay kapitan ang mopirma sa maong manifesto nga ilang ipalabang usab sa konseho, dugang ni Ayuman.

Gihimo nilang sanglitanan ang kahagip-ot sa dalan nga gitagana para sa BRT diin tag-usa ra ka lane ang matag bus sanglit ang dakbayan gagmay ra og mga karsada sama sa Hanoi, Vietnam diin palpak usab ang ilang implementasyon sa BRT.

Ang BRT manukad sa barangay Bulacao sa south nga mopaingon sa barangay Talamban sa north district.

Matag oras, gikatakdang makapasakay kini og 330,000 ka pasahero matag adlaw sa ubos nga pletihan.

Si Atty. Rafael Yap, BRT manager, nagkanayon nga nahibawo sila sa problema didto sa Vietnam ug ilang gisiguro nga ang ipatuman dinhi di mahisama.

Si Secretary Michael Dino niingon nga kon pag-usik-usik ra sa kwarta ug kahago ang implementasyon sa BRT, usa kini ka katalagman sa siyudad ug iya kining ipahunong.

Buot niyang ipasabot nga iyang gamiton ang iyang posisyon para pag-awhag sa buhatan ni Duterte ug sa ubang ahensiya sa gobiyerno nga may labot sa BRT aron di kini ipadayon.

Apan si Mayor Tomas Osmeña una rang nibutyag nga kon suwayan ni Dino og pahunong, iya usab himuon kutob sa iyang makaya aron mapugngan si Dino sa iyang laraw. /