P1.9M NGA MGA ALAHAS GIKAWAT

Mokabat ngadto sa P1,963,000 nga kantidad sa mga alahas ug mahalong mga relo ang giangkawat gikan sa usa ka balay sa Doña Rosario Village, Barangay Labogon, dakbayan sa Mandaue niadtong Dominggo sa udto.

Giingong ang mga tagbalay nanimba atol sa insidente ug sa ilang pag-uli gikan sa misa, nahanaw na ang ilang vault nga gibutangan sa mga alahas ug mahalong relo.

Matod ni PCInsp. Mercy Villaro sa Mandaue City Police Office nga padayon gihapon ang imbestigasyon sa pagpanglungkab.

Nasuta ning mantalaan nga way CCTV camera ang balay sa biktima (kinsang ngan gipugngan tungod sa seguridad) ug wa usay CCTV ang

guard house sa subdivision. Gidudahan nga sayon ra nga nakasud ang mga kawatan sa subdivision tungod kay way logbook ang maong subdivision.

Sumala pa ni Villaro nga mga ala 1:40 sa hapon, nakadawat sila ug tawag sa 911 kalabot sa insidente.

Pag-abot sa kapulisan sa crime scene ang biktima nialegar nga ang tibuok pamilya nanimba mga alas 10 sa buntag ug niingon nga sa ilang pag-abot abli na ang pultahan sa balay.

Daling gisusi sa biktima ang master bedroom ug didto nakita nga abli ug guba na ang sliding window sa kasilyas.

Wa na usab ang safety vault sa kwarto sa maong pamilya diin sud niini ang mga 9 ka mga dul-an sa P1.5 milyones ang kantidad ug mga alahas nga dul-an sa P500 mil.

Paambit pa ni Villaro nga wa nakabantay ang mga silingan ug mga kasikas sa dihang wa ang mga tagbalay kay nanimba.

Nagduda ang kapulisan nga ang mga kawatan nisud gikan luyo sa balay ug gipanglugit niini ang mga lock sa mga pultahan ug didto sa pagsulod sa balay. /