Malnutrition miubos, obesity mitaas sa dakbayan sa Mandaue: Dr. Seno
Kaso sa malnustrisyon sa dakbayan sa Mandaue miubos apan, kaso sa obesity o overweight sa dakbayan mitaas.
Kini maoy gipaambit ni Dr. Edna Seno sa Mandaue City Health sa dihang nahinabi sa mga tigbalita kagahapon.
Matod ni Seno nga gikan sa 955 ka kaso (1.94 porsyento) sa malnutrisyon gikan Enero ngadto Hunyo sa milabayng tuig, niubos kini ngadto sa 917 (1.79 porsyento) ka kaso.
Apan nitaas sa 0.47 porsyento kon 242 ka mga kaso sa overweight gikan sa buwan sa Enero hangtod Hunyo karong tuiga kaysa 0.44 porsiyento kon 218 ka mga kaso sa milabayng tuig.
Saysay ni Seno nga daghang rason nganung nitaas ang kaso sa overweight sa kabataan edad 5 ngadto sa 8 anyos.
Una mao nga hilig ang mga kabataan ug pagkaon og mga
fastfood ug wa nay panahon ang mga ginikanan sa pagluto ug masustansyang pagkaon alang sa pamilya ilabi na sa ipabawon nga pagkaon sa mga anak sa tunghaan.
“Di na matutukan ang nutritional needs sa child kay focus kaayo sa trabaho ang mga parents,” matod ni Seno.
Gawas niini, sigun niya nga minus usab ang pisikal nga aktibidad sa mga bata ug anaa sa mga gadgets ang atensyon niini imbes magduwa ug ilihok ang lawas.
Padayag ni Seno nga padayon ang ilang adbokasya sa city health office aron batukan ang malnutrisyon ug obesity sa dakbayan.
Iyang awhag sa mga ginikanan nga sila mismo ang moluto sa pagkaon sa ilang mga bata ug likayan ang pagsige og kaon sa mga pagkaon sa fastfood restaurant.
Sa samang bahin, si Konsehal Raul Kevin Cabahug, chairman sa komitiba sa panglawas, nipasar usab ug resolusyon nga nagduso sa pagkaon og root
crops ug ubang alternatibo sa bugas nga humay.
Kini maoy unod sa iyang resolusyon number 93-2017 nga nihangop sa resolusyon no. 017-02 sa Regional Nutrition Committee sa National Nutrition Council VII sa pagkaon ug mga root
crop nga makaayo usab sa panglawas, ni Cabahug.