BISAN KA DUHA NAHAGBONG
Dili pangutana kon kapila ikaw nahagba, apan kon giunsa nimo pagbangon sa kada lukapa nimo.
Kini ang gabayan sa kinabuhi ni manlalaban Rey Malicay Gealon, 36, kanhi magsisibya sa radyo ug nahimo usab nga suloguon sa katawhan sa ilang lungsod ug sa dakbayan sa Sugbo.
Siya usa na karon sa mga sinaligan ug usa sa unom ka founding partners sa E.C. Labella and Partners Law firm.
Sa paglangkat ni Gealon sa iyang pagkaabogado, niagi una siya og di tiaw nga pagsuway.
Kaduha siya nahagbong. Maora siyag gitiawan sa kapalaran tungod kay tag .05 percent ra ang kuwang sa iyang score, makapasar na unta siya.
Una niyang damgo mao ang pagkapari mao nga nisulod siya sa Salesian Brothers Seminary sa Don Bosco dihang grade 5 na siya, apan ang iyang mga ginikanan nga sila si Reynaldo ug Sylvia Malicay di gusto apan way nahimo kay maoy iyang gusto.
Labaw nga nakaengganyo ni Gealon mao nga adunay tag-duha ka oras nga gitagana sa football matag adlaw sa ilang klase ang Don Bosco nga maoy iyang ganahan.
Siya ni-graduate sa high school sa Don Bosco Technological School niadtong 1997 ug ni-enroll sa University of San Carlos ( USC) sa kursong Political Science (PolSci).
Nilampos siya sa PolSci niadtong 2001 ug ni-enroll sa USC sa kursong Bachelor of Laws.
NAHADLOK
Sa unang tuig sa iyang pagtungha, maayo pa ang dagan bisan kon nagtrabaho na siya kaniadto sa Bombo Radyo Philippines sugod 2000.
Sa 2002 nagkaproblema na siya, di sa financial, kon di sa iyang subject sanglit wa siya makapasar.
Ang iyang professor kaniadto nga si Atty. Joseph Gonzales, niingon nga 75 porsiyento sa iyang klase hagbong sa iyang subject.
Si Gealon, kinsa nagdahom nga apil siya, paghuman sa semester, nibalhin og eskwelahan, sanglit ang USC adunay patakaran nga kon mahagbong og duha ka bar subjects ang tinun-an, di na siya dawaton sa unibersidad.
Didto nibalhin siya sa SouthWestern University (SWU) samtang padayon siya sa iyang pagkapanibya ug hangtod nigraduate niadtong 2006.
Dihang mokuha na siya og pasulit sa Bar, nikuha siya og dokumento sa USC.
Iyang nasayran nga pasar diay siya sa subject ni Gonzales ug mahimo pa unta siyang moeskwela sa USC nga maoy bugtong tunghaan nga gusto sa iyang ginikanan. Sa una ug ikaduha niyang kuha sa Bar Exam, nahagbong siya. “Akong hunahuna, lisensiya raman gyud akong kuwang. Pirmi kong prepared ato pero pirme gyud nga almost tag .05 percent ra ang kuwang para makapasar ko,” pagdasig ni Gealon sa iyang kaugalingon. Apan luyo sa iyang pagkapositibo, nagpahipi ang iyang kauwaw sa iyang mga classmate nga nipasar hinungdan nga sa ikatulo niyang Bar, nag- self review nalang siya. Niadtong 2008, wa siya nitan-aw sa Bar result.
GILUDHAN ANG HALIGI
Samtang nanuroy sila sa iyang asawa nga si Atty. Jill Ann Molleno Paculba Gealon, kinsa usa na ka Assistant City Prosecutor, adunay daghang nag-text kaniya nga nipasar siya sa Bar.
Sa iyang kalipay, nikalit siya og luhod atubangan sa usa ka haligi sulod sa SM City ug nagpasalamat sa Ginuo nga gihatag na ang iyang pangandoy.
Karon si Gealon aduna nay upat ka mga anak nga silang Reeze Ysabel 9, Joachim Angelo 7, Thandie Margaux 5 ug Jose Iñigo 3.