Retiro o panguwarta?

Daghang kilay ang misaka gumikan sa kapilidihan ni Pambansang Kamao Manny Pacquiao sa mga kamot sa batan-on ug agresibo nga Australian boxer, Jeff Horn, sa ilang away sa World Boxing Organization (WBO) welterweight division didto sa Brisbane, Australia niadtong Domingo.

Walay knockout. Napilde si Manny via unanimous decision.

Samtang iyang gidawat ang iyang kapildihan, apan gikuwestiyon ni Manny ang scoring sa mga judges kay matod pa sa analysis sa uban ug sa CompuBox daghang gibuhian si Manny nga mga suntok ug daghan ang miigo niini kon itandi sa gibuhian nga mga kinumo ni Horn ug gamay lang ang miigo ni Manny. Aw, ako dili makaingon nga adunay tikas kay wa ra ba tay pruweba.

Pero bisan gitikasan si Manny, dili naman puwede siyang maka-protesta kay matod pa sa nakatatak sa masiao tipsheet: "El pallo del juez es en apelable." Unsay buot ipasabot? Ang desisyon sa huwes dili na puwedeng iapelar.

Apan sa akong gamay nga opinyon ug pagtan-aw sa maong duwa, morag nagkahuyang na ang Pambansang Kamao. Wala na ang iyang kusog ug paspas nga santako kon itandi niadtong mga 30 anyos pa siya.

Kini gumikan na sa edad ni Manny nga 38 anyos na siya. Matod pa nga samtang magkatiguwang ang tawo, magkaluya man gyud. Kitang mga edadedaran na nakasinati niini. Magkadoul na kag 40 anyos, morag mohinay na gyud ang imong nilihukan ug daghan nang mga pamation sa lawas.

Si Horn, 29 anyos pa unya abtik ug agresibo pa.

Kini gong boxing, physical man god ni nga duwa. Buot ipasabot nga gikinahanglan ang igong hangin, stamina ug kusog. Kon mawala na nimo, aw, panahon na siguro nga imong hunahunaon nga moretiro na ka. Matod pa sa Eningles nga "the great enemy of an athlete is his age."

Busa panahon na siguro nga huna-hunaon ni Manny ang pag-retiro. Wala nay angayupa siyang iprobar sa iyang kaugalingon. Ana na kaniya ang tanan. Apan kon gusto gyud niya nga manguwarta na lang bisan dili na kaya sa iyang lawas, aw, hala padayon. Pero mawad-an na siya sa iyang dungog. Wala nay ganahan niya.