Di na maglalis

Nagkasumpaki na karon sila si Cebu City Mayor Tomas Osmeña ug Presidential Assistant for the Visayas Michael Dino kalabot sa Bus Rapid Transit (BRT). Matod ni Dino nga iyang ipadangat ngadto kang Presidente Rodrigo Duterte nga di na aprobahan ang BRT kay mausik lang ang P10 bilyunes nga utangon niini kay di magsilbe ang mao nga matang sa mass transport system.

Gibasehan ni Dino mao ang pamahayag ni Engr. Rene Santiago, usa ka eksperto sa engineering ug transportasyon, nga di haum ang BRT dinhi sa Sugbo tungod sa hagip-ot nga mga karsada. Inay mosulbad sa trapiko, hayan mopasamot pa hinuon kini sa suliran.

Si Osmeña positibo nga mosalir kini sa Sugbo bisan pakyas kini sa pagsulbad sa trapiko sa pipila ka mga dakbayan sa China, Bangkok sa Thailand ug Jakarta sa Indonesia.

Kining panagsungi karon sa baruganan tali nila ni Osmeña ug Dino dali ra nga ihigot sa pulitika kay kontra silang duha.

Apan kining ilang mga panglantaw dunay mga basehanan. Maingon tang tumong nila mao ang kaayuhan sa mga Sugboanon. Kang Osmeña nga masulbad ang trapiko sa siyudad samtang kang Dino, di mausik ang bilyunes nga salapi.

Ning nagsungi nga baruganan karon, ang neutral nga grupo sama sa Metro Cebu Development and Coordinating Board angay nga mopatunga, bisan kon wa usab kauyon si Osmeña kanila.

Kini gung panaglalis sa duha way maayong sangkoan tungod kay mopadugay kini og samot sa pagpatuman sa mga proyektong mosulbad sa grabeng trapiko sa Sugbo.

Malikayan unta kining mao nga suliran kon ang mga opisyal kaniadto lapad ug layo pa og mga panglantaw. Kana bang sa ilang pagplano kaniadto, ila nang nalantawan ang problema karon.

Inay maglalis karon, nganong di man lingkuran kining mao nga suliran?