Gi-politika ang BRT ug LRT?

Niabot na unta ang panahon nga matukod ang Bus Rapid Transit (BRT) ug Light Rail Transit (LRT) sa Metro Cebu. Subo kay gilawgaw kini tungod sa politika.

Kay ngano man gyud nga ibangga ang duha ka solusyon sa kahuot sa trapiko dinhi sa Sugbo?

Dugay na kitang mga Sugboanon nga nagkauyon kabahin niining BRT. Tuod man, niabot na ang panahon nga nagahinan na kini og pundo ug nagsugod na ang implementasyon.

Wa sab kita mobabag niining plano nga magtukod og LRT dinhi sa Metro Cebu.

Alang kanako, ang BRT makatabang pagpagaan sa kahuot sa trapiko dinhi sa Syudad sa Sugbo. Ang LRT makatabang sa pagpapaspas sa pag-transport sa mga pasahero gikan sa ubang mga syudad ug lungsod sa Metro Cebu.

Mo-complement man ang BRT ug ang LRT.

Apan tungod sa politika, gipaguwa karon nga kinahanglang dili ipadayon ang BRT aron madayon ang LRT.

Bisan pa man og suportado na sa lain-laing mga ahensya sa kagamhanan lakip na sa Malakanyang kining BRT, nanganti karon si Presidential Assistant for Visayas Mike Dino nga mo-lobby siya aron di madayon kini.

Ngano? Kay iyang giduso nga proyekto ang LRT.

Sa ako lang, kon kaayuhan sa Sugbo ang iyang tuyo, dapat lang di siya mobabag sa BRT. Kay di ba diay mahinayon ang LRT kon mopadayon ang BRT?

Usa ra gyud ang atong matumbok nga hinungdan nganong di siya sa BRT. Ug kana mao ang politika.

PACQUIAO-HORN

Daw nihinay na man si Manny Pacquiao. Di ba nawingig man si Jeff Horn sa ninth round? Apan nawala kadtong atong mahinumdoman kang Pacman nga dabo-dabohan dayon ang kaatbang.

Mao nga wa gyud matumba ang Horn ug nibalik man ang kaabtik sa sunod round.

Hinuon, posible sab nga naluya ang Pacquiao tungod sa samad sa iyang ulo. Tungod ba kaha kadto sa mga headbutt o tungod sa siko sa Australyano ug pag-lock sa liog.

Bisan pa man, niguwa nga mas daghan ang kumo ni Pacman ang nakaigo kay sa ni Horn. Mao nga di klaro kadtong pagka dauga sa batan-ong boksidor. Magduda kita nga giluto ra diay sa mga hurado.

Tungod niini, uyon ko sa panawagan nga mag-rematch. Mas maayong matino nato nga modaog pa ba gyud si Pacquiao o dili na. O basin di klaro kining kadaugan ni Horn.

Bisan pa og dunay mga higala di na manan-aw sa pay-perview, atong nakita sa miaging Dominggo nga daghan ang modugok gihapon sa iyang fight.

Mao kini ang akong nabantayan dihang nipadung ko sa Palm Grass Hotel aron motan-aw sa ilang away. Mingaw ang kadalanan sa Sugbo. Ug sa pag-abot namo sa hotel, nagpunsisok na ang mga tawo sa sulod.

Wa laing boksidor nga Pinoy ang makapadugok og ingon niini.