Undangon ang BRT?

Tikas? Daghan ang nasuko ug naguol nga napildi si Pacman kon Sen. Manny Paquiao ni Jeff Horn sa gitawag nga “Battle of Brisbane” didto sa Australia kay matud pa di kaantigo moihap sa suntok ni Pacman ang mga hurado.

Ang atong sports karon morag natakdan sa pulitika. Ang mapildi moingon gitikasan. Ang boksing dunay hurado nga moihap sa suntok sa boksingero nga maoy basihan sa modaug. Ang kadtong ihap sa gawas igo ra to mohatag og pagduda sa desisyon sa hurado.

Apan daghan sad ang nalipay nga nakadaug si Jeff Horn labina kadtong nakapusta sama sa akong pare Ed Gica. Kadtong napildi sa pustaanay bisag litikanay lang sori na lang. Sa sunod na lang og dunay rematch sila si Pacman ug Horn. Komedya pa sa akong amigo nga wa magsilbi ang Pacman sa sungay (Horn). Kay matod pa sa nakakita sa boksing kadaghan gisungag ni Horn si Pacman ug gilugpitan sa liog. Pero, sa barugay pa lang lupig nang daan si Pacman. Mas taas si Horn ug batan-on pa gyud.

Akong tambag sa mga napildi nga dumadapig ni Pacman ayaw mo og kaguol o kasuko kay ang inyong gidapigan super milyonaryo gihapon bisan og napildi. Matud pa sa taho, US$25 milyun nga bayad kang Pacman wa pay labot ang iyang bahin sa pay per view.

LRT vs. BRT. Kaniadto niingon ko nga maglisod og implementar ang Bus Rapid Transit (BRT) sa dakbayan sa Sugbo tungod sa kahagip-ot sa mga dalan. Maihap ra ang dalan nga halapad. Apan, uyon ko sa rason nga mawagtang na ang PUJ, nga mayoriya sa mga drayber abusado.

Si OPAV Secretary Mike Dino tungod sa opinyon ni Engr. Rene Santiago, nga dili molungtad ang BRT tungod sa tungod sa mga dalan nga hagip-ot, iyang irekomendar ni President Duterte ug sa mga ahensya sa gobyerno nga di na ipadayon ang BRT.

Segurado ko nga moulbo ang kaspa ni Mayor Tomas Osmeña sa pagabuhaton ni Secretary Dino dili lang tungod kay mawani ang iyang BRT project apan tungod kay daan na sila nga di maayog kabubut-on sa usag usa.

Si Engr. Santiago dili supak sa BRT nga ipadayon. Ang dakong apan tungod sa kadako, P10.2 bilyunes, nga kwarta nga utangon aron maimplementar ang BRT. Ang Light Rail Train (LRT) maayo, sama sa Manila, kay adto man sa ibabaw sa dalan moagi.

Duna say opinyon nga di na angay mangutang pa og kwarta aron ipalit og mga bus tungod kay dunay daghan operator og bus dinhi sa Sugbo, nga mahimo nga sila na ang mopadagan sa rota sa BRT apan ubos sa management sa dakbayan.

Angay ba nga undangon ang BRT project unya ang LRT ang ipuli? Ang inyong tubag makatabang sa pag-umol sa husto nga opinyon sa atong mga opisyales sa kagamhanan.