Benefit concert alang sa music icon sa Sugbo

Dunay nipahibawo nako nga na-stroke sa miaging semana ang beteranang singer ug naparalisar kuno ang pipila ka bahin sa iyang lawas.

Ako ning nakumpirmar sa Facebook post ni Ms. Ophelia Nadela, ang tag-iya sa Slabadu Café and Bistro, kinsa dunay ipahigayon nga benefit concert alang ni Willie Ygot, ang nailang bokalista sa Fire and Lites band (kanhi Firelights).

Ang benefit concert gitawag og “Music Heals,” diin ang manukar live mao ang Fire and Lites, Interact ug Next Stage. Ipahigayon ni karong July 10, Lunes, 8 p.m. sa Slabadu Café and Bistro sa Mandaue nga dunay pulta nga P150.

Mga pangaliya nga dili ra seryuso ang maong sakit ug makabalik ra dayon sa pag-awit ang music icon sa Sugbo nga si Willie Ygot.

SURAMBAW?

Kakita mo sa away ni Manny Pacquiao ug Jeff Horn? Okay ra man unta mapildi si Pacquiao pero mapildi sa ingon ato ka hugaw modag away sa kontra plus pa sa referee nga nagmika lang makalagot gyud tinuod.

Dili sad ta kabasul nga dunay mga magduda nga basin gituyo to og surambaw aron dunay rematch kay puwerteng punoa sa venue.

Siyempre dakong kuwarta kon dunay rematch. Ah, negosyo gud.

TAPING

Maoy paglabang nako gikan sa SM City Cebu niadtong Huwebes dihang dunay nanampit nako.

Ang mama Flor diay ni Dodoy Teberio (alyas Tubig Queen). Excited kaayo niyang gipahibawo nako nga mag-taping na ang “Magpakailanman” sa lifestory sa iyang anak.

“Aw, wa pa diay mag-taping?” nangutana ko.

“Wa pa, katong niadto mig Manila interbyu ra man to sa host nga si Mel Tiangco,” tubag niya.

Nadayon gyud ang taping nila niadtong Dominggo ( July 2), diin lakip sa ilang gi-shootingan ang Fort San Pedro, UC Main, ug ang sidewalk sa SM City Cebu, diin sila naninda. Congrats!

VICOR

Usa ka special collector’s package nga gitawag og The Vicor Story ang gi-release sa Vicor Music isip selebrasyon sa ilang 50 katuig sa OPM industry (19662016). Lakip sa sulod niini ang lima ka CD nga dunay 100 classic OPM hits.

Si Boss Vic del Rosario nga maoy tag-iya sa Viva Entertainment Group of companies ug si Orly Ilacad ang mga founder sa Vicor. Mao nang gitawag og Vicor kay kumbinasyon sa ilang pangan. Salamat kaayo sa kopya. I like it!