You should know by now
Kinsa man say di makugang nga hilumon man nga pagka tawo si Derwin? Sus, nangisog siya ron nako, uy! Hapit gud ko matuk-i sa akong gikaon.
“Unsa to, Derwin, ang imong gipangutana nako?” Bisag klaro na, apan giseguro nako ang giingon sa akong boyfriend.
“Kadtong laki nga gikaestorya mo sa school campus, kinsa man to siya? Malipayon man kaayo mo? Duna moy relasyon, no?” God!
Hilom na lang kong nakaingon. Gusto kong maglagot kang Derwin apan nagpugong lang gyud ko sa akong kaugalingon. “Daan ko na siyang friend, Win. Ayaw tagaig malisya ang among pag-estorya ug kamalipayon. Labaw na nga wa mi relasyon.”
Hinay lang ang akong tingog. Mogawas nga guilty ko kon mangisog sab ko. Gusto kong ipakita kang Derwin nga dakong sayop ang iyang pagtuo.
“Di ko gusto nga makig-estorya kag dugay kang bisan kinsang laki, Nicole!”
“What? Sus, Derwin, ayaw pag-iningon ana nako. Sa wa ka pa nako sugta, duna na koy mga friends nga mga laki.”
“Basta ang akong gusto maoy sunda.”
Isog gihapon ang tuno sa sinultihan ni Derwin. Nakapanghupaw na lang ko. Miinom ko sa juice sa akong baso. Miundang na kog kaon. Kalit kong nawad-an og gana.
“Mamauli na ta, Derwin. Aw, kon di ka pa mopauli, mouna lang ko nimo.”
Mitindog ko. Mitindog sab si Derwin. Nagkusmod siya. “Ihatod tika sa inyo.” Samtang nagsakay mig taksi, wa mi tingug-tingog si Derwin. Pasiplatan ko siya panagsa. Mao gihapon ang iyang hitsura. Nagkusmod gihapon. Nakapanglingu-lingo ko. Hangtod sa pag-abot sa among balay, wa gihapon mi tingganay si Derwin. Mikanaog ko sa taksi ug way lingi-lingi nga misulod sa gate. Daplin lang sa dalan ang among balay.
Wa dayon ko makatulog niadtong gabhiona. Si Derwin ang akong gihunahuna, ingon man ang iyang kinaiya nga bag-o ko lang nahibaw-an. Karon pa lang gyud. Di kay ako ra diay ang seluso. Hangtod na sab diay si Derwin. Unya nahunahuna ko si Ray. Mas labaw ka abubhoan si Derwin kay kang Ray.
Naghuwat ko nga motawag si Derwin nako, o kaha moteks man lang. Apan nakatulog na lang ko, wa mahitabo ang akong gipaabot. (SUMPAYAN)