Still single
Dear Noy Kulas,
Tagoa lang ko sa pangan nga Nelia, 36 years old and still single.
Kining akong problema parte ni sa among pamilya. Naa mi lola nga more than 90 years old na ug usahay motukar ang ango ango. Ako kinanamanghurang anak sa ikaduhang anak sa akong lola. Bale duha ra sila ka magsuon si Mama. Kay toa sa abroad ang pamilya sa among iyaan, si Lola naa namo. Karon kay medyo dunay illness si Mama, gipaundang ko og work kay aron mobantay kang Lola. Bisan sakit para nako, ni resign ko aron way daghang gubot.
Pero di lalim magbantay og tiguwang. Akong giingnan akong mga igsuon nga magkuha mi og makabantay ni Lola. Among pahibaw on among iyaan ug mga ig agaw. Ingon sa akong mga igsuon nga di na lang mi manghasol kay dugay na si Lola namo. Unsaon kaha nako ni akong situation, Noy? Akong gihuna huna nga nagkadako ang akong edad, maglisod na ko sa pagpangita og work. Worried ko kay single pa ra ba ko. Please tambagi ko unsay akong buhaton. NELIA Nelia,
Ikaw diay ang nagpas-an karon sa pag-atiman sa inyong apohan. Bitaw, di na lalim ang mag-atiman. Labina gyud kon medyo badlungon ang bantayan. Bisan maayo ang imong gibuhat, balido ang imong kabalaka sa imong ugma tungod kay nagkaedaran ka na unya single. Gikinahanglan duna kay tinigom ug medical insurance. Sagad ra ba aning single, maglisod sa pagpaatiman sa immediate family kay bisan gani tong nangaminyo, ang anak magtulodtulod, unsa na kaha kon iyaan na. Maayo lang kon close kaayo ang pamilya.
Kon pila mo ka magsuon, mahimo man nga mag contribute mo og ikasuhol aron makakuha mo og mobantay sa inyong apohan. Aron dunay kalidad ang makabantay, kanang igo ang suweldo nga maka afford, sama anang midwife. Mahimo ra ninyo kini kon inyong pahibaw-on ang inyong mga ig agaw nga toa sa abroad. Bisan ginagmay, kay dollar man, dako na kaayo nag ikatabang kon mag-amutay mo para ikasuweldo. Ayaw pagpanagana og sulti kay tinuod, maayong managana ka alang sa imong ugma. Wa say dautan kon magsuhol mo og makaatiman sa inyong apohan.
Wad-a na ninyong ikog tungod kay alang kana sa kaayuhan sa inyong lola ug kanimo aron di ka usab magsalig nila puhon. NOY KULAS