SMB COM'S CUP KING
Naangkon sa San Miguel Beer ang titulo nga dugay na kaayong wala nila maangkon sa dihang ilang gipukan ang TNT Ka Tropa sa Game 6 aron langkaton ang 2017 PBA Commissioner’s Cup championship.
Misandig sa katakos ug kahanas sa ilang mga sinaligan, ang Beermen midemolis sa Ka Tropa, 115-91, atubangan sa gibanabanang 10,000 kapin o kulang sulod sa Araneta Coliseum aron tapuson ang best-of-seven finals, 4-2.
Kini maoy ika-24 nga kampyonato sa San Miguel sulod sa 38 nila ka taak sa finals. Hinuon kini ang bugtong Commissioner’s Cup title sa Beermen sukad niadtong 2000 sa dihang ilang gipildi ang Sta. Lucia.
“TNT… brought out the best in us,” matod ni SMB coach Leo Austria human sa kadaugan. “Both of us deserved to win the championship, but we’re really fortunate, because my players really wanted to win. This is the Cup that we haven’t won in the last 17 years.”
Si Charles Rhodes, ang Best Import sa conference, maoy nangulo sa San Miguel nga may 30 puntos, 11 ka rebounds ug upak ka blocked shots.
Maayo usab nga nakasuporta si Alex Cabagnot kinsa naka-triple double miyagyag og 19 puntos, 12 ka rebounds ug 11 ka assists. Kini maoy unang triple-double nga nahimo sa usa ka local player sa finals sukad sa tuig 2005.
Nakab-ot sa Beermen ang sayon nga kadaugan bisan pa man og di maayo ang gipakita sa kasamtangang MVP nga si June Mar Fajardo kinsa igo lang naka dos puntos ug upat ka rebounds sulod sa 14 minutos.
Gipasabot ni coach Austria nga wa kaayo sila mosandig sa kapabilidad ni Fajardo tungod sa adjustment nga ilang gihimo.
“Alam natin na June Mar is a very important piece of our team,” ni Austria pa. “But this is a game of adjustment, and we can adjust in the by fielding in a small line-up. Naging effective ‘yun para sa amin.”