Si Manny ray nasayod
Kon dunay pinakabati nga away si Manny Pacquiao nga akong nakita sukad ma sukad, usa na niana katong iyang away niadtong Domingo batok ni Jeff Horn sa “Battle of Brisbane” didto Suncorp Stadium sa Brisbane, Australia diin siya gihukasan sa iyang bakus.
Dako ang akong pagtuo nga ang kakulang sa preparasyon nga giubanan usab og dakong kompiyansa maoy hinungdan nganong bagal kaayo siya nga manglihok ug maglisod siya sa iyang tayming.
Sa sinugdanan pa lang human makompirmar ang iyag pagpakig-away ni Horn mora og gibaliwala lang niya ang kapabilidad sa Australian challenger nga kanhi usa ka magtutudlo.
Mahimong gilinghoran ang kampo ni Pacquiao sa ilang kontra kay gawas nga ka 16 pa kini siya maka away, dili pa gyud mga inilang fighter ang sagad niya gipamildi.
Laing gitumbok nga rason mao ang edad ni Pacquiao nga gani ultimo ang iyang asawa nga si Jinkee mipasumbingay na nga angay na gyud moretiro ang iyang bana.
Tinuod dako kaayo og kalahian sa inawayan ni Pacquiao niadtong Dominggo kon itandi sa mga nangagi, pero sama sa uban, lisod kaayong tuohan nga modaog si Horn niadtong awaya.
Daghan man tuod siya og mga kumo nga gibuhian, pero sagad niini way klarong igo. Nagpasuabi usab ang iyang pagsigi og panungay ug ingon man ang pagpangtorse ngadto ni Pacquiao.
Duha gyud ka gisi ang naangkon ni Pacquiao sa iyang ulo tungod sa headbutt ni Horn.
Sa akong scoring, si Pacquiao midaog og pito ka round sam- tang lima lang ang kang Horn, lakip na ang round 9 niini diin gamay nalay kuwang nga matumba si Horn human kini nahilam-os sa mga sukmag ni Pacquiao hangtod nga naabtan na lang sa bagting nga nagsusapinday ug nibarag ang 29-anyos nga kanhi Olympian.
Mao nga after sa fight, akong giingnan ang akong higalang katapad ra usab nako nga si Quiot Barangay Captain Francis Esparis, kinsa libring nagpasalida sa maong away diha sa Quiot gym, nga modaog sa Pacquiao bisan pa man og lahi ang iyang inawayan.
Pero sa unsang pagka-unsaa nga ang kamot man hinuon ni Horn maoy giisa isip bag-ong World Boxing Organization (WBO) welterweight champion.
Duko ang mga ulo sa mga nitan-aw sulod sa gym samtang nanggawas nga nagbagutbot usab sa maong desisyon.
Nibalik usab sa ilang panumdoman ang susamang hitabo niadtong unang away ni Pacquiao ug ni Timothy Bradley kinsa nakaangkon usab sa kontrobersiyal nga kadaugan pero nagsakay og wheelchair nga miatubang sa media human sa away.
Aron pagresolbar sa kontrobersiya, gihimo ang rematch ug dili pa igo namugna pa gyud ang ikatulo nilang panagsangka hangtod nga napamatud-an ni Pacquiao ang iyang saktong dominasyon batok ni Bradley.
Kon nahitabo kini sa Pacquiao-Bradley fight way rason nganong di kini mahimo sa Pacquiao-Horn bout ilabi na kay naka-attract ug nakakulit kini og kasaysayan in terms of attendance.
"After all boxing is business and only Manny knows when to hang the gloves."