Mingla daog sa Game 1
Gipildi sa Minglanilla Archangels ang Consolacion Sarok Weavers, 7770, sa Game One sa ilang best-of-three finals sa 2017 Cebu Governor’s Cup Intercities/municipalities basketball tournament sa Minglanilla Sports Complex niadtong Dominggo.
Perming nabiyaan sa first half, ang Archangels nagsugod og arangkada sa third quarter human kini miusab sa ilang depensa nga maoy nakaparalisa sa opensa sa Sarok Weavers hangtod na sa katapusang hut-ong sa panag-engkuwentro nga gisaksihan sa gibanabanang dul-an 8,000 ka mga misaksi sulod sa complex.
Mosuway pagtabla sa series ang Sarok Weavers ugmang sa gabii sa dihang sila na usab ang mo-host sa Game 2 sa Consolacion National High School gym sa alas 7 sa gabii.
Sila si Jeisil Tarrosa ug ang managsuong sila si Marc Glen ug Mark Justine Nebril maoy naghatag og labad sa ulo sa Consolacion ni coach Jun Pepito sa opensa nga giabagan usab nila ni Kevin Quimson ug John Mangaron.
“Maglisod mi sa match up defense, kay maayo man ang ilang mga perimeter shooters. So mihimo tag adjustments sa atong 1-2-2 unya atong gibutang si Tarrosa sa tunga aron maoy mokuha sa midrange shooter.
Gamble na lang to at okay moabli man ang shooters sa kilid,” matod ni Minglanilla headcoach Edito Salacut.
Naglabaw ang Consolacion sa first half, 36-29, apan ang 17-6 run nga gipabuto sa Minglanilla maoy nakapausab sa dagan sa duwa, diin naposte sa Archangel ang 72-57 nga labaw, 3:49 ang nahabilin sa fourth quarter.
Sa maong rally, si Justine Nebril mipabuto og duha ka triples samtang 10 puntos usab ang natampo ni Mark Glen Nebris.
Misuway unta sa paggukod ang Consolacion ug mipahagsa og 13-4 nga rally apan ang pagtapwas ngadto sa sais puntos na lang mao ray ilang pinakaduol nga nahimo sanglit nakuwangan sila sa oras.
Mga puntos: Minglanilla (77) - MJ Nebril 20, MG Nebril 17, Tarrosa 14, Quimson 11, Mangaron 9, Pepito 2, Eredera 2, Sellote Consolacion (70) - Villamor 36, Montaño 16, Escalona 6, Yu 6, Maglasang 2, Gonzaga 2, Panta 2. Quarters: 13-16; 29-36; 55-51; 77-70.