'MAYPANG MOTAYA SA STL KAY SA MASIAO'

Giawhag sa Mandaue City PoliceOffice (MCPO) ang publiko nga mopusta sa Small Town Lottery (STL) sa Philippine Charity Sweepstakes Office kay sa motaya sa iligal nga sugal sama sa masiao, swertres ug ubang card games.

Ang ilang kampanya batok sa sugal maoy nagsunod sa anti illegal drugs operation.

Dunay pagtuo nga ang sugal ug illegal nga drugas sagad magkuyog.

Sukad Hulyo sa milabayng tuig, moabot na sa 422 ka mga tawo ang nasikop sa MCPO sa 262 ka mga operasyon niini batok sa illegal gambling.

Sobra sa P50,000 na usab ang nasakmit gikan sa maong mga iligal nga sugal.

Matod ni Sr. Supt Roberto Alanas, hepe sa MCPO, nga bugtong ang STL lang nga regular nga duwa gikan sa PCSO ang gitugot sa nasyunal nga kagamhanan.

Dugang niya nga mas maayo sab kini sanglit makatabang kini nga makapundo og charity programs, pundo sa local nga kagamhanan alang sa health ug medical programs, makapawala sa iligal nga numbers game ug makatabang aron makahimo og dugang trabaho.

“In lieu of patronizing illegal numbers game, people are encourage to patronize STL and help combat/eradicate illegal gambling in Mandaue City,” ni Alanas.

Dugang niya nga bisan kusog ang ilang kampanya batok drugas apan wan ila biya-i ang pagsugpo sa mga iligal nga sugal.

Tungod niini, ang MCPO nilusad usab sa Small Town Lottery “Swerte ang Taya sa Legal: Bawat Taya mo, nakatulong ka sa Charity”.