Osmeña mikwestyon sa pagtumaw sa eksperto

Gikwestyon ni Mayor Tomas Osmeña ang paglutaw sa ngalan ni Rene Santiago, usa ka eksperto sa engineering ug transportasyon, kinsa niingon nga mausik ug mapalpak ang implementasyon sa P16 bilyones nga Bus Rapid Transit (BRT).

“You only become an expert today? Ngano man karon lang?,” pangutana ni Osmeña.

Ang mayor nagkanayon nga kon tinuod pa nga sila nagpakabana sa proyekto diin makabenipisyo ang gatusan ka libo ka mga Sugbuanon, ila unta kining gipadayag kaniadto.

Si Presidential Assistant for the Visayas Michael Dino nagkanayon nga kon tinuod ang obserbasyon ni Santiago, iyang hangyuon ang Malacañang ug ubang ahensiya sa di pagpatuman niini.

Matod ni Santiago nga ang dakbayan gagmay kaayo og dalan og tag-usa ra ka lane ang mahatag sa BRT nga sama didto sa Hanoi sa Vietnam nga nausik lang.

Subli nga gipadayag ni Osmeña nga kon suwayan og babag ni Dino ang BRT, iya usab himuon kutob sa iyang makaya aron di molampos ang presidential assistant.

Si kanhi Mayor Michael Rama sa iyang bahin nagkanayon nga supak siya sa dinalian nga kanselasyon sa BRT inay tunan una kini sanglit nakita usab sa karibal ni Osmeña nga dako kini og ikatabang sa siyudad.

Ang BRT giaprobahan sa National Economic Development Authority (Neda) niadtong 2014 atol sa administrasyon ni Rama.

Dugang sa mayor nga maayo ang BRT kon itandi sa Light Rail Transit (LRT) sanglit paingon na kini nga ipatuman ug ang LRT molanat pa og daghang katuigan sa dii pa mapatuman.

Si Osmeña nibutyag nga di na kinahanglan nga aprobahan sa Regional Development Council (RDC) ang BRT sanglit proyekto kini sa Cebu City.

Matod sa mayor nga momando siya og imbestigasyon kabahin sa direktiba sa RDC 7 sanglit si Chairman Kenneth Cobonpue ug si Dino kauban sa ilang negusyo ug posible nga adunay conflict of interest.