Way umento sa abangan sa merkado
Mipahibawo ang kagamhanan sa dakbayan sa Talisay nga way umento sa abangan sa bag-ong merkado sa Tabunok.
Kini maoy gipahibawo ni City Treasurer Emma Macuto kinsa miingon nga kini maoy pagtuman sa saad ni Mayor Eduardo Gullas.
Matod ni Macuto nga ang ilang sundon kon pila ang kolektahon nga abangan mao ang anaa sa Revenue Tax Code,diin didto nakalatid ang abangan sa mga stall sa merkado.
Gipasabot niya nga adunay mga stalls sa gitukod nga merkado nga ang bayranan fixed sa P4,500 ang buwan samtang aduna usay abangan nga magdepende sa gidak-on sa pwesto diin matag metro kwadrado anaa sa P7.50 ang bayranan matag adlaw samtang adunay stall nga ang gidak-on moabot sa 28 ngadto sa 30 metro kwadrado.
Si Talisay City Engineer Gamaliel Vicente Jr. mipahibawo nga sa kinatibuk-an aduna silay 91 ka stalls nga natukod sa bag-ong edepisyo sa phase-1 ug phase-2 samtang moabot lang sa kapin sa 40 ka mga mamindahay ang ilang ibalik sa pwesto.
Hinuon gipasabot ni Vicente nga ning higayona mahimo pa silang makadawat og laing mga interesado nga maninda sa ilang merkado basta makasunod lang sa tanan nilang mga lagda ug dukomento.
Matod ni Macuto nga base sa ilang nasabutan kadtong intresado nga maninda mo-down og duha buwan sa abangan samtang sila na ang mobayad sa ilang suga ug kuryente.
Iyang gipasabot nga ubos kaayo ang ilang abagangan tungod kay ila man kining gibase sa 2011 pa nga Revenue Tax Code.
Nagkanayon si Macuto nga karong tuiga ila nang usbon ang Revenue Tax Code sa Talsiay samtang unya na kini sa sunog tuig ipatuman.
Apan ang maayong balita tungod kay si Gullas mimando na kaniya nga pasakaan ang ubang buhisan apan di iapil ang abangan sa merkado.
Si Gullas miingon nga bisan bag-o ang pasilidad ug migasto ang siyudad og minilyon, di kinahanglan nga mahal ang abangan tungod kay wa man giutang ang pagtukod sa building ug way silay giapas nga bayranan.
Nasayran nga sa pagkakaron aduna nay 17 ka mga mamindahay ang gikatadang makasugod na sa pagbalhin ug sagad kanila manindahay og mga bugas.