Drayber nadasmagan sa 2 ka trak, patay

Namatay ang usa ka traysikol drayber human nadasmagan sa duha ka mga trak sa highway sa Barangay Pakigne, lungsod sa Minglanilla niadtong Martes sa hapon.

Si SP04 Edgar Belisco, deputy chief sa Talisay Police Station, niila sa namatay nga si Wilpaul Castro Cañedo, 46, minyo, taga sityo Pinggan, Barangay Pakigne.

Ang nakadasmag kang Cañedo mao sila si Archie Suico, 37, taga Cabangahan, lungsod sa Consolacion, drayber sa trak nga nagkarga og softdrinks.

Ang drayber sa prime mover giila nga si Juanito De Gracia Jr., 48, taga Gawaygaway, Uling siyudad sa Naga.

Si Belisco niingon nga si Cañedo nagmaniho sa traysikol samtang nagsunod sa trak dekarga nga tig-deliver og softdrink paingon sa Minglanilla.

Paghiabot sa lugar gikan sa eskina, si Cañedo ug ni u-turn aron pag-pick-up untag pasahero sa dihang naigo sa nagsunod nga trak dekarga.

Tungod sa impact, niabot sa pikas lane ang traysikol ug naigo usab sa prime mover nga nagpaingon unta sa dakbayan sa Sugbo.

Gumikan sa kakusog nga impact, nalagpot ang traysikol ngadto sab sa primemover nga gimaneho ni De Gracia.

Gibutyag ni Belisco nga ang ulo ni Cañedo maoy nagrabehan ug dali untang gidala sa tambalanan apan gideklarar nga dead on arrival.

Ang duha ka mga drayber sa trak pulos gitanggong sa bilangguan.

Apan ang duha pulos niingon nga disgrasya ang hitabo tungod sa kakalit nga nibutho sa traysikol sa karsada.

Si Suico niingon nga hinay ra ang iyang dagan apan ang kalit nga pagliko sa traysikol maoy nakaingon ngano iya kining naigo.

Samtang si De Gracia niingon nga nisuway siya sa pag-apply og brake apan wa na siyay nahimo.

“Wala nako kahibawo sa sunod kay nipiyong nalang ko pagkaigo niya kay kalit kaayo,”asoy ni De Gracia.

Hinuon, ang duha ka mga drayber niingon nga andam silang makig-areglo sa pamilya sa namatay tungod kay aksidente ang hitabo.