Di iyaha ra

Sa iyang State of the City Address (Soca), gipasigarbo ni Cebu City Mayor Tomas Osmeña ang kampanya sa drugas kay sud sa iyang administrasyon, napuhag ang siyam sa top 10 drug personalities sa siyudad sa Sugbo. Iyang gitumbok sila si anhing Rowen Secretaria ug Jeffrey “Jaguar” Diaz nga napatay sa iyang pagsugod sa pag-asumer sa katungdanan.

Pasabot niya nga wa kini mahimo ni kanhi mayor Michael Rama dihang mao pa kini ang naghupot sa ryenda sa kagamhanan.

Apan kon huna-hunaon og maayo, sila si Secretaria, Diaz ug kaubanan wa mamahimong drug lord sud lang sa usa ka gabii. Taas nga panahon ang ilang gilanat una pa sila nahimong bigtime.

Dihang si Osmeña pa ang naa sa katungdanan, naa na kini sila. Apan sama kang Rama, wa siyay nahimo o naglisod siya sa paggukod sa mao nga mga grupo.

Naatol karon nga si Presidente Rodrigo Duterte na ang namunoan, kinsang prayoridad sa unang mga buwan sa katungdanan gigugol sa pagkombate sa drugas, hinungdan nga ang kapulisan pursigido sa paghingusog og maayo sa kampanya.

Kon wa pa si Duterte ug kapulisan, mahimo kaha ang pagpuhag sa dagkong mga durugista sa Sugbo? Imposible.

Bisan kon si Rama pa ang nahimong mayor, seguradong mao gihapon kini ang mahitabo tungod kay di lang dinhi sa Siyudad sa Sugbo niinit og maayo ang kampanya, kon di sa tibuok nasod.

Mas maanindot tingali paminawon kon ang mayor nagpasalamat sa kapulisan sa ilang way puas nga kampanya batok sa drugas, ug ang kridito sa dakong kalampusan sa nanglabay nga mga buwan, iyang gihatag ngadto sa kapulisan ug sa Malacañang.

Di niya mahimong angkunon nga iyaha ra ang kalampusan.