Pacquiao sa Don Bosco
Karong Dominggo na among oathtaking,” ingon akong misis, nga usa sa napili nga opisyales sa parents, teachers, community association (PTCA) sa Don Bosco diin among anak grade one.
“July 2? Pacquiao fight man na,” mitubag ko. “Ngano diay’g Pacquiao fight?” ingon siya. “Bitaw, ngano diay’g Pacquiao fight?” ingon pud ko. Bitaw, pag Dominggo padayong normal ang tuyok sa kalibotan samtang si Pacquiao nakigsumbagay ni Horn.
Di na sama kaniadto nga kon duwa gani ni Pacquiao morag holiday sa Pilipinas. Suwayi og schedule og meeting atol sa duwa ni Pacquiao di ba way manambong. Kaniadto, mahimong Family Day ang duwa ni Pacquiao kay magtapok man ang tanan sa balay, magsugba-sugba ug magtagay.
Ug grabe ang bation nimo nga paghigugma sa nasod kon Pacquiao fight na. Mas magkahiusa pa ang mga tawo sa duwa ni Pacquiao kaysa sa State of the Nation Address sa presidente. Di nimo malikayang maemosyonal.
Dihay usa ka duwa ni Pacquiao, katong kataposan nilang Marquez, nga wa nako napugngi ang pagtulo sa akong luha pagkanta’s bayang magiliw.
“Hoy nihilak man gud ka diha,” gikataw-an ko’s akong ig-agaw. “Kahilak ko’s tuba, gaw, pait kaayo,” tubag pud intawon nako.
Ug dihang gipalukapa na ni Marquez si Pacquiao usa ka segundo na lang unta mahuman na ang sixth round, ningtiyabaw na gyod ko morag bata. “Kinsay nagbutag sili nga pwerteng daghana ining monggos? Kahilak man pud ta ani!” singgit pa nako.
Ug mao to, nanambong gyod mi ni misis sa iyang oathtaking. Apan bisan pa man og di na sama sa una ang kakusog sa duwa ni Pacquiao, wa gihapon namo kapugngi nga mo-check sa Facebook kon naunsa na ang away, bisan pa atong nanumpa na si misis.
Tungod sa kadaghan nila nga opisyales, wa na sila pasak-a sa stage ug gipabarog na lang sila kon asa sila nahimotang.
PTCA President: I, state your name... Akong asawa: I, Rachel Mae Sarmiento Niñal... President: Do solemnly swear... Asawa: Do solemnly... Ako: Shit pildi si Pacquiao. Asawa: Shit pildi... swear...
President: To fulfill my duties…
Asawa: To fulfill… moundang na unta na siya oy… my duties… Ako: Sa boxing? President: To the best of my abilities…
Asawa: Sa politika… to the best of my abilities…
Ug paghuman sa “So help me God,” namakpak ming tanan ug nalimtan si Pacquiao.
Hoy nihilak man gud ka diha,” gikataw-an ko’s akong ig-agaw. “Kahilak ko’s tuba, gaw, pait kaayo,” tubag pud intawon nako.