You should know by now
Wa na ko makalikay kang Ray kay nakita man ko niya. Nakaahat ko sa pagpahiyom. Nindot kaayog pinahiyoman si Ray nako. Naghunong lang ko sa akong gitindogan. Giduol ko ni Ray.
“Sus, dugay-dugay gyud, no, Nicole, nga wa ta magkita.” “Bitaw, uy.” Naglingi-lingi ko. Di ko makatan-aw og diretso kang Ray. Ambot sab ning akong kaugalingon nga medyo nauwaw man ko sa akong ex-boyfriend.
“Adto ta didto aron magkaestorya ta pag-ayo.”
Ang Goldilock maoy gitudlo ni Ray. Wa koy tingog nga mitando. Wa koy tingug-tingug nga misulod sa maong kan-anan. Si Ray ang nag-order sa among esnak. “Nakakita ka namo?” “Kamo si Shiela? Di kay nakita ta lang mo nga nagkuyog, nakadungog gyud ko sa iyang giingon, sa iyang kasuko nimo.”
“Nakaila ka diay niya, Nicole?”
“Karon pa lang, uy! Nadungog ko nga gitawag mo siya sa maong ngalan.”
“Girlfriend ko siya. Ikatulo human nimo.”
“Wow! Kusoga gud nimo? Nakatulo dayon ka?”
“Well, sila man ang nagpakitag motibo nga nakagusto sila nako? Aw, unsay dugayan. Pero zero na ko ron.”
Miseryuso si Ray. Mikatawa ko. “Bitaw!” “Nganong nakahibawo ka man, Nicole?”
“Nakadungog lagi ko sa inyong pag-estorya. Nadungog kaayo nako ang iyang pagpakigbuwag nimo, uy. Nadungog ko sab ang imong pag-uyon sa iyang gusto.”
Miginhawag lawom si Ray. Mitan-aw siyag dugay nako.
“Sakit, no?” Miseryuso sab ko.
“Di tanto, uy! Di parehas sa kasakit nga akong gibati dihang nagbuwag ta. Sakit gyud kaayo, Nicole. Nakahibawo gyud ka kon unsa tika kamahal.”
Mikatawa ko. Gipakita ko kang Ray nga wa ko seryusoha ang iyang gisulti.
“Kaniadto ra to, uy, Ray. Nakauyab gud kag katulo.”
“Panakip-butas, Nicole. Yes. Aron pag-ilad sa akong kaugalingon, nga after you makabaton gihapon kog uyab nga gimahal gyud nako. But I failed.”
Nakaduko ko. Di ko gusto nga dugayon pa ang among pag-estorya ni Ray. Nakahuman na sab kog kaon niadtong tungora. “Mopauli na ko, Ray.” “Ihatod tika sa inyo, Nicole.” “Ayaw na lang, uy. Sige, ha, mouna lang ko nimo. Thank
you sa esnak.” Mitando si Ray. Mibiya ko niya ug nagdaling migawas sa Goldilock. Sa didto na ko sa gawas, mihuot ang akong dughan.