TAMBAGI KO, NOY KULAS

Kaslunon

Dear Noy Kulas,

Just call me May, 25 years old. Supervisor ko sa usa ka food outlet.

Naa koy kauban nga manghod nako og one year. Suod mi kay siya ang pirme masangpit nako sa trabahoan. Bisan sa mga outing, magkasinabot kaayo mi.

Hangtod nga gyud ang time, Noy, nanguyab siya nako. Tinuod moangkon ko, na develop na ang akong feeling para niya tungod sa among ka close. Sugton unta nako siya pero naa siyay uyab nga mabdos na ug kaslunon sila karong tuiga.

Gusto siya nga magkarelasyon mi kay ang iyang heart kuno naa nako ug mas bug-at ko para niya kay sa iyang uyab. Kasugtunon na ko pero ang iyang sitwasyon maoy nakapugong nako. Please tambagi ko kay pila na ka nights nga wa koy tarong nga katulog tungod ani. MAY May,

Ayaw na lang pagtabok sa taytayan kay basin maglisod ka na og balik. Sayon ra kaayo alang niya ang pagsulti kay di man ikaw ang naa sa iyang sitwasyon. Huna-hunaa ra gud, kon madayon ang ilang kasal kay mabdos na ang babaye, unsa may mahitabo nimo? Mahimo ka rang biyaan niya. Or magpadayon mo sa pagtago-tago nga relasyon nga di usab makaayo nimo.

Ayaw na pagsulod og relasyon tali niya. Mas maayo nga samtang sayo pa, di ka na makigsuod niya. Pagpalayo na niya tungod kay di makaayo kanimo ang imong padulngan. Ikaw ra ang masakitan in the future kon imong pasumban ang gipitik karon sa imong kasingkasing. Sa kanunay ko nang giingon, kon kasingkasing ug emosyon na gani ang magdiktar, lisod kining lingkawasan. Struggle ang sinugdanan, apan sa ngadto ngadto, imo ra kining mapiog sa hinayhinay nga paagi.

Sa imong status ug edad, makakita ka pa og lalake nga mohigugma kanimo nga way problema. Kanang di ka maproblema ug masulod sa kompromiso. Unya maglisod ka pa gyud sa paggawas kon gusto ka nang molingkawas. Busa samtang wa pa modako ang problema, ayaw na lang gyud siya pasumbi sa iyang pagbati. NOY KULAS (Alang sa imong problema, e-mail sa kulassuper@sunstar.com.ph ug rojval69@ yahoo.com)