Midaog si Mariella
Pagdali, Mariella! Paspasi pagdagan! Hapit na ka moabot sa finish line!” abiba ni Melodina, iyang higala. Apan natumba si Mariella. Gibikugan siya.
Usa ka gatos ka metros na lang unta ang iyang daganon aron modaog siya, apan dili na niya maalsa ang iyang mga tiil. Nagkaduol na sa iyang nahimutangan ang uban nga nangapil sa lumba sa dagan nga layo niyang gibiyaan ug nagsunod kaniya.
Mihilak si Melodina nga nagsud-ong kang Mariella. Moduol unta siya niini, apan may pulis nga mibadlong kaniya.
“Mariella!” singgit ni Melodina.”Unsay nahitabo nimo? Duol na ang finish line!”
Nabati ni Mariella ang tingog sa iyang higala, apan mis- amot kasakit ang iyang mga batiis. Unya nahinumdom siya sa miaging adlaw dihang mipahuway siya sa punoan sa bagalnga gikan nga nag-jogging. May babaye nga miduol kaniya. Nagsul-ob kinig sapot sa usa ka atleta, jogging pants ug jacket nga kulor asul.
“Pag-amping kanunay sa imong kaugalingon, Inday,” matod sa babaye nga wa maklaro ni Mariella ang nawong. “Ako runner sab kaniadto, apan daghan ang nasilag kanako sa kanunay kong pag-apil ug pagdaog sa lumba sa dagan. Daghang nasina sa nahuptan kong abilidad. Nangita silag paagi nga dili ko molampos sa kanunayng pagdaog. Ila kong giblakingan gamit ang ilang mga tiil, nga maoy hinungdan sa akong pagka aksidente niadtong higayuna. Natumba ko ug napantok ang akong ulo sa dakong bato. Gidala ko nila sa ospital, apan DOA ang hukom sa doktor nga miatiman nako.”
Misamot ang kahibulong ni Mariella sa gipamulong sa babaye. Sa wala pa kini molakaw may gitugon, “Anak, sangpita ako sa higayon sa imong kalisdanan. Andam ako kanunay pagtabang nimo kay buotan ka.”
Nahinumdom siya sa dugay nang mitaliwan niyang inahan. Matod sa iyang apuhang babaye, tulo pa ka tuig iyang edad niadtong panahon sa pagka aksidente sa iyang Mama Rossana dihang miapil kinig lumba sa dagan, bayinte ka tuig na ang nakalabay.
“Mariella, my best friend!” sangpit na sab ni Melodina. “Bangooooon! Duol na ka sa finish line! Hinumdomi imong Mama sa buhi pa siya. Usa siya ka runner nga kadaghan makampiyon!
Nahinumdom si Mariella sa babaye nga nagpakita kaniya sa miaging adlaw. Nagpakitabang siya. “Mama, nasayod ko nga ikaw kadtong nagpakita nako. Gikinahanglan ko imong panabang karon. Tabangi ko!”
Unya nabatyagan ni Mariella ang bugnawng huros sa hangin nga misapigad sa iyang lawas. Kalit mibangon siya. Gibalikan siya sa iyang kusog. Duna nay tulo ka partisipante sa lumba nga nakalagpas na kaniya, mao nga kusog kaayo siya nga misutoy ug naapsan ang tulo nga nahibulong sa kakusog sa iyang pagdagan. Hangtod nahiabot si Mariella sa finish line nga nagdupa sa duha niya ka kamot. Nabatyagan niya nga ang espiritu sa iyang Mama Rossana ang misulod sa iyang lawas kaganina. Nalipay si Melodina nga nagsud-ong sa iyang higala. Midaog si Mariella. (KATAPUSAN)