Kombensiyon sa Saksi ni Jehova 2017

Ang mga Saksi ni Jehova mohimo na usab sa ilang tinuig nga kombensiyon sa Hoops Dome karong Hulyo 14-16 ug Hulyo 21-23, 2017.

Ang tanan kinasingkasing nga gidapit sa pagtambong niining tulo-ka-adlaw nga kombensiyon. Ang tema sa programa karong tuiga maoy “Padayon sa Paglahutay!”

PANGUNANG MGA BAHIN

Mga Pakigpulong ug mga Interbiyo: Susiha kon sa unsang paagi tabangan sa Diyos ang tanang matang sa mga tawo nga makalahutay, bisan karon, Roma 15:5.

Multimedia: Tan-awa kon sa unsang paagi ang Bibliya ug ang kinaiyahan (nature) nagtudlog mga leksiyon kon unsaon sa paglahutay.

Pelikula: Kada hapon, sundi ang estorya sa usa ka pamilya nga nakasabot kon nganong si Jesus niingon: ‘Hinumdomi ang asawa ni Lot.’ —Lucas 17:32.

Binase sa Bibliya nga Pakigpulong Publiko: Sa Dominggo sa buntag, makabenepisyo ka sa makapadasig nga pakigpulong nga nag-ulohang “Ayawg Wad-a ang Imong Paglaom!”

Sugod karong Hulyo 1 hangtud sa mosunod nga mga semana, ang mga Saksi ni Jehova mopaabot sa ilang personal nga imbitasyon ngadto sa tanan nga nagpuyo sa Probinsiya sa Cebu, nga motambong niining maong mga kombensiyon.

Ang kapin sa 30 ka mga kongregasyon sa mga Saksi ni Jehova dinhi sa Cebu manghatag og imbitasyon para sa maong kombensiyon. Walay bayad ang pagtambong. Ang mga kombensiyon sa mga Saksi ni Jehova gisuportahan pinaagi ug boluntaryo nga mga donasyon.

Ang matag sisyon magsugod sa alas 8:20 sa buntag ug matapos sa alas 3:50 sa hapon.

Gibanabana nga adunay mga 3,000 ang motambong didto sa Hoops Dome alang niining binase sa Bibliya nga mga programa.

Ang mga Saksi ni Jehova sa tibuok Pilipinas nag-organisar ug mga kombensiyon nga sama niini sa lain-laing mga pinulongan diha sa dagkong mga siyudad.

Sa tibuok kalibotan, adunay kapin sa 8,000,000 ka mga Saksi diha sa kapin sa 119,000 ka kongregasyon.