GOOD LUCK, JEO: MREMA
“Duna gyuy ma knockout.” Kini maoy giluwatan nga pamulong ni boxing sensation ug world prospect Jeo Santisima sa dihang sa unang higayon iyang gikahimamat ang undefeated Tanzanian fighter nga siGoodluck Mrema sa press conference kagahapon sa Rajah Hotel sa Fuente Osmena, dakbayan sa Sugbo.
Ang duha magsinukliay sa ilang kinumo karong Sabado sa main supporting bout sa Pinoy Pride 41:The New Generations nga pangaulohan sa WBO International Featherweight title fight tali ni undefeated Mark “Magnifici” Magsayo (16-0, 12KOs) ug sa beteranong Nicaraguan challenger nga si Daniel “El General” Diaz (23-7-2, 15KOs) diha sa IEC Pavilion sa Mabolo ning dakbayan sa Sugbo.
Matod ni Santisima aka Santino nga wa kaayo siya masinati sa estelo ni Mrema tungod sa ka nihit sa video footage niini sa usa ka video tape iyang namatikdan nga usa kini ka in-and-out fighter o technical boxer nga aduna usay igong kusog.
“Dili siya dalidali nga mosud. Morag in-and-out ang iyang style ba. Pero duna na mi counter ana. Basta tan-aw nako duna gyuy ma-knockout. Sa masipyat lang ani,” matod ni Santisima kinsa adunay record nga 13-2, 11 Kos nga baraha.
Ang deklarasyon ni Santisima gisuportahan usab sa iyang trainer nga si Michael Dominggo kinsa nagkanayon nga “di ni moabot og round, kay sa akong obserbasyon kay naa na may power si Santisima. Di lang nato dali-dalion huwat lang ta sa tayming.”
Alang kang Edito Villamor, ang matchmaker/trainer sa Ala Gym, nga usa kini ka pagsugod ug pagsuway sa kalidad ni Santisima.
Ingon ni Villamor nga usa ka champion si Mrema sa ilang nasod nga wala pay pildi ug dili kini angay kompiyansaan.
Apan si Paul Akoth, ang manager/trainer ni Goodluck Mrema, sa ilang bahin, masaligon nga magpabiling undefeated ang iyang batos. Iyang gipasabot nga preparado sila ning awaya ug gani ila kining gitratar nga usa ka championship fight.
“Actually, Goodluck wants a bigger fight. At 22 he has a good record but we decided to come here to fight because this is a well organized company. We are very prepared for this. This is a good fight and maybe there will be a knockout,” matod ni Akoth. “We can’t tell what round but if it comes we will take the opportunity.” Una pa man tuod ning a- way ni Mrema gawas sa ilang nasod apan wa kini niya ikabalaka. Si Mrema adunay 160, 8KOs nga baraha.
Pinaagi ni Akoth, matod matod ni Goodluck, nga wa gyud siya mobati og pressure ug wa usab siyay gihambin nga kakapoy sa ilang hataas nga biyahe.
Taliwala sa iyang pasalig nga saktong kombati ang iyang ipakita karong Sabado, sa samang higayon, nanghinaot usab siya og kaayohan ngadto ni Santisima pinaagi sa pag-ingon, “Good luck, Jeo.”