'KONSEHAL SHABU'
3 KA KONSEHAL SA SAN FERNANDO NALAKIP SA LISTAHAN SA DRUG PROTECTORS: PRO 7
Tulo ka mga konsehal sa lungsod sa San Fernando nasikop sa sunodsunod nga mga ronda sa kapulisan Biyernes sayo sa buntag.
Ang tulo pulos nakuhaan og ilegal nga mga armas samtang duha kanila nakuhaan og illegal drugs.
Si Police Regional Office (PRO 7) Regional Director Noli Taliño nilambigit sa tulo sa grupo sa giingong drug lord nga si Franz Sabalones, apan ilang gihimakak ang alegasyon.
Gihulagway silang mga drug protector ug nalambigit sa pagpamaligya og drugas.
Mga opisyal nga nasikop ug nalakip sa mga listahan sa high value target (HVT) mao sila si Konsehal Johnny Arriesgado, 54; Konsehal Edwin Villaver, 46; ug Konsehal Alfonso Donaire, 46.
Si Arriesgado, barangay kapitan sa Magsico ug pangu sa Association of Barangay Councils (ABC) sa San Fernando, nakuhaan og kalibre .45 nga pistola nga dunay mga bala ingon man usa ka gubaon nga caliber .30 nga pusil.
Si Villaver, taga Brgy. Greenhills, nakuhaan og duha ka 9mm pistol, usa ka kalibre .45 nga pistola, .357 caliber revolver ug usa ka medium nga putos nga shabu nga nitimbang og walo ka gramos ug P148,00 ang balor.
Si Donaire, taga Brgy. North Poblacion, nakuhaan og usa ka kalibre .45 nga pistola, mga bala ug usa ka medium size nga shabu nga balor og P148,000.
Ang tulo gitumbok sa kapulisan nga HVT.
Ang joint operation sa kapulisan gipanguluhan ni Supt. Joie Yape Jr., hepe sa Provincial Intelligence Branch (PIB) sa Cebu Provincial Police Office (CPPO); Regional Intelligence Division nga gipanguluhan ni Sr. Supt Jonathan Cabal; Regional Special Operations Group (RSOG 7), Provincial Drugs Enforcement Units(PDEU) nga gipanguluhan ni Chief Inspector Roland Aliser, Provincial Public Safety Company ug San Fernando Police Station pinanguluhan ni Sr.Insp.Adrian Nalua.
Ang mga ronda pinasikad sa search warrant nga giisyu ni Judge Jerry Dicdican sa Regional Trial Court (RTC) Branch 25 sa dakbayan sa Danao kabahin sa paghupot og mga tag-as nga armas ug eksplosibo.
GRUPO NI SABALONES
Si Yape nga nahinabi sa Superbalita Cebu niingon nga sila si Villaver ug Donaire pulos mga dako sa grupo ni Sabalones.
Si Arriesgado apil gihapon sa grupo, dugang ni Yape.
Dugay na nga gi-monitor sa Police Regional Office 7 ang tulo ka mga konsehal sa lungsod.
Si Taliño nikompirmar nga nalakip ang tulo sa ilang listahan sa mga protektor ug nalambigit sa illegal nga drugas human sila gitumbok sa mga residente sa ilang tagsa-tagsa ka mga lugar.
“Yan ang information na bina validate natin kasi lumabas din yan sa ating intelligence information na sila ay konektado kay Franz Sabalones,” matod ni Taliño.
Duna silay laing target nga personalidad nga mas taas pa kay sa tulo sa San Fernando.
Si Donaire naapil sa listahan ni Presidente Rodrigo Duterte, matod ni Yape.
Napagya ang ilang mga ngan human giingong sila ang manalipod sa madakpan og drugas sa kapulisan sa lungsod.
Si Yape nipasabot nga ang pagkalambigit sa tulo nagpasabot nga naglihok pa ang grupo ni Sabalones bisan kon toa siya sa Camp Crame sukad pa sa miaging tuig.
Apan si Sabalones nanghimakak na nga naa pa siya sa illegal drugs pinaagi sa iyang abogado.
Gipasalamatan ni Yape ang mga lumolupyo sa San Fernando nga nisuporta sa kapulisan sa paghatag nilag information kabahin sa mga tawo sa ilang lugar nga nalambigit sa illegal nga kalihukan.
NANGHIMAKAK
Si Arriesgado nga nahinabi sa Superbalita Cebu niangkon nga iya ang mga paltik nga armas.
Matod pa niya nga sayop siya kay wala siya mokuhag lisensiya sa armas ug igo lang gipahibawo ang kapulisan nga nagtiner siyag armas nga magamit nga depensa sa mga badlungon sa ilang lugar.
Gibutyag niya nga dunay mga maldito sa ilang barangay nga nalambigit sa drugas ang manukol.
Giangkon niya nga nakasuyop siya og shabu, apan tulo na ka tuig ang nakalabay sukwahi sa pasangil nga kanunay siyang magsuyopsuyop.
Si Donaire nga nahinabi sa Superbalita Cebu nanghimakak sa tanang pasangil batok kaniya.
Matod niya nga planted ang kalibre .45 nga armas sanglit wa siyay armas ug labaw na nga planted ang shabu.
Matod ni Donaire nga nasubo siya kay siya ang tsirman sa committee on public safety ug aktibo sa kampanya batok sa drugas apan gipasanginlan.
Sila si Arriesgado ug Donaire pulos nipasangil nga biktima sila sa pulitika.
Giangkon nila nga mosuroy kaniadto sa ilang lugar si Sabalones, ilabi na niadtong panahon sa election kay nangayo sa ilang tabang sa kandidatura sa igsuon nga Bise Mayor Fralz Sabalones.
Samtang si Villaver wa na moluwat og pamahayag.
UNDANG NA MO: DAVIDE
Si Gobernador Hilario Davide III nga nasayod nipahimangno sa uban pang mga opisyal nga nalambigit sa illegal.
“They should stop na if they are engaged in illegal activities especially drugs. They should stop na or else the law
will catch up with them,” matod sa gobernador, chairman sa Cebu Provincial Anti-Drug Abuse Council (Cpadac).
Si Davide nibutyag nga gipahibawo siya base sa confidential report nga ang mga dinakpan mga tawo sa gidudahang drug lord nga si Franz Sabalones.